ઈરાન અને ઈઝરાયેલ વચ્ચે સતત વધી રહેલા લશ્કરી સંઘર્ષને કારણે સમગ્ર વિશ્વમાં ચિંતાનો માહોલ છે. આ ગંભીર પરિસ્થિતિ વચ્ચે એવી અટકળો પણ તેજ થઈ છે કે અમેરિકા અને ઈરાન વચ્ચેનો શાંતિ કરાર હવે જોખમમાં મુકાઈ શકે છે. આ વૈશ્વિક તણાવની વચ્ચે અમેરિકાના રાષ્ટ્રપતિ ડોનાલ્ડ ટ્રમ્પે એક અત્યંત ચોંકાવનારી ભવિષ્યવાણી કરી છે. ટ્રમ્પે દાવો કર્યો છે કે અમેરિકા આગામી થોડા જ અઠવાડિયામાં ઈરાન પર સંપૂર્ણ વિજય જાહેર કરશે. તેમણે એમ પણ ઉમેર્યું કે ઈરાનના વાટાઘાટકારો અમેરિકાની તમામ શરતો માનવા અને બધું જ આપી દેવા માટે તૈયાર થઈ ગયા છે. રિપબ્લિકન પાર્ટીની એક ઓનલાઈન સભાને સંબોધિત કરતી વખતે ટ્રમ્પે આત્મવિશ્વાસ વ્યક્ત કર્યો હતો કે આ બધું ખૂબ જ ટૂંક સમયમાં પૂરું થઈ જશે અને તેના કારણે આંતરરાષ્ટ્રીય બજારમાં ક્રૂડ તેલના ભાવ પણ નીચે આવશે.

એક અહેવાલ અનુસાર, ડોનાલ્ડ ટ્રમ્પે ગઈકાલે સાંજે રિપબ્લિકન સેનેટર લિન્ડસે ગ્રેહામ અને ગવર્નર પદના ઉમેદવાર પામેલા એવેટના સમર્થનમાં યોજાયેલી એક ઓનલાઈન રેલીમાં ભાગ લીધો હતો. આ રેલી દરમિયાન જ જનતાને સંબોધતા ટ્રમ્પે જણાવ્યું હતું કે, જ્યારે અમે આગામી બે અઠવાડિયાની અંદર સંપૂર્ણ વિજયની જાહેરાત કરીશું, ત્યારે સાચા અર્થમાં તમારી જીત થશે. આ એક ઐતિહાસિક અને સંપૂર્ણ વિજય હશે જે ખૂબ જ ઝડપથી આપણી સામે આવશે. આ સફળતાની સાથે જ તેલના ભાવમાં પણ મોટો ઘટાડો જોવા મળશે.

ડોનાલ્ડ ટ્રમ્પે અગાઉ પણ દાવો કર્યો હતો કે ઈરાનની લશ્કરી ક્ષમતાઓ હવે પહેલા જેવી મજબૂત રહી નથી અને તે નોંધપાત્ર રીતે નબળી પડી ચૂકી છે. આ કારણે જ વર્તમાન ઈરાન-ઈઝરાયલ સંઘર્ષ ક્યારેય ન સમાપ્ત થાય તેવા લાંબા યુદ્ધમાં પરિણમશે નહીં. યુએસ રાષ્ટ્રપતિના મતે, અમેરિકા કાં તો તેહરાન સાથે એક મજબૂત પરમાણુ કરાર સુરક્ષિત કરવાની ખૂબ જ નજીક છે અથવા તો લશ્કરી તાકાતના માધ્યમથી પોતાના નિર્ધારિત લક્ષ્યોને પ્રાપ્ત કરી લેશે.

જ્યારે ટ્રમ્પને પૂછવામાં આવ્યું કે શું અમેરિકા મધ્ય પૂર્વ (મિડલ ઈસ્ટ)માં ફરી એકવાર કોઈ લાંબા સંઘર્ષમાં ફસાઈ જશે? ત્યારે તેમણે આ વાતને સાવ નકારી કાઢી હતી. તેમણે સ્પષ્ટ કર્યું કે ઈરાન વિરૂદ્ધનું આ અભિયાન ભૂતકાળમાં આ વિસ્તારમાં લડાયેલા અમેરિકી યુદ્ધો કરતાં સાવ અલગ છે અને તેમને આવા ક્યારેય ન ખૂટતા યુદ્ધો બિલકુલ પસંદ નથી. એક ઇન્ટરવ્યુમાં જ્યારે રેડ લાઇન વિશે પૂછવામાં આવ્યું ત્યારે ટ્રમ્પે જણાવ્યું કે, મારી રેડ લાઈન ત્યારે હશે જ્યારે મને લાગશે કે હું કોઈ સોદો કરી શકું તેમ નથી અથવા સોદામાં ઘણો વિલંબ થઈ રહ્યો છે. જો કે, તેમણે આશા વ્યક્ત કરી કે વાટાઘાટો અંતિમ તબક્કામાં છે, પણ જો રાજદ્વારી પ્રયાસો નિષ્ફળ જશે તો અમેરિકા આ મામલાને લશ્કરી રીતે સમેટી લેશે.