સ્ટ્રેટ ઓફ હોર્મુઝમાં ફરી એકવાર બારૂદી ગરમાવો જોવા મળી રહ્યો છે. ઈરાની મીડિયાએ દાવો કર્યો છે કે અમેરિકન યુદ્ધ જહાજ પર મિસાઈલો છોડવામાં આવી છે, જ્યારે અમેરિકાએ આ ઘટનાને સંપૂર્ણપણે પાયાવિહોણી ગણાવીને ફગાવી દીધી છે.

મિસાઈલ હુમલાનો વિવાદ અને અમેરિકાનો ઈનકાર
પરિસ્થિતિ ત્યારે વધુ વણસી જ્યારે ઈરાનની અર્ધ-સત્તાવાર ન્યૂઝ એજન્સી 'ફાર્સ' એ દાવો કર્યો કે જસ્ક ટાપુ પાસે એક અમેરિકન યુદ્ધ જહાજ પર બે મિસાઈલો છોડવામાં આવી હતી. આ ટાપુ જલડમરુમધ્યના દક્ષિણી પ્રવેશદ્વાર પર છે, જ્યાં ઈરાની નૌકાદળનો મુખ્ય બેઝ આવેલો છે.

અમેરિકાની સ્પષ્ટતા
અમેરિકી અધિકારીઓએ આ અહેવાલનું કડક રીતે ખંડન કર્યું છે. વરિષ્ઠ અધિકારીઓએ સ્પષ્ટ કર્યું છે કે કોઈ પણ અમેરિકન યુદ્ધ જહાજ પર મિસાઈલથી હુમલો થયો નથી. સમાચાર એજન્સી રોયટર્સે પણ જણાવ્યું છે કે તે સ્વતંત્ર રીતે ઈરાનના આ દાવાઓની પુષ્ટિ કરી શક્યું નથી.

અમેરિકાની સખત ચેતવણી
અમેરિકાએ ઈરાનને જહાજો પર હુમલો કરવા સામે કડક સૂચના આપી છે. એક્સિયોસના અહેવાલ મુજબ અમેરિકી અધિકારીઓએ સ્પષ્ટ કર્યું છે કે જો ઈરાન હોર્મુઝમાંથી પસાર થતા જહાજો વિરુદ્ધ કોઈ પણ પગલું ભરશે, તો તેનો જડબાતોડ જવાબ આપવામાં આવશે. અમેરિકી સેનાએ ચેતવણી આપી છે કે ઈરાન દ્વારા લોન્ચ કરવામાં આવેલી કોઈ પણ મિસાઈલ કે સ્પીડબોટને તરત જ નષ્ટ કરી દેવામાં આવશે.

ટ્રમ્પનું નિવેદન અને વધતો તણાવ
ઈરાને સોમવારે અમેરિકી દળોને આ વ્યૂહાત્મક જળમાર્ગમાં પ્રવેશ ન કરવા ચેતવણી આપી હતી. આ ચેતવણી અમેરિકી રાષ્ટ્રપતિ ડોનાલ્ડ ટ્રમ્પના તે નિવેદન બાદ આવી હતી, જેમાં તેમણે કહ્યું હતું કે અમેરિકા ખાડીમાં ફસાયેલા જહાજોને સુરક્ષિત બહાર કાઢશે. ઈરાન આ ક્ષેત્રમાં અમેરિકાની સૈન્ય ગતિવિધિઓને પોતાની સુરક્ષા માટે જોખમ માની રહ્યું છે.

​​​​​​​હોર્મુઝની સામુદ્રધુની એ વિશ્વના તેલ અને ગેસના પરિવહન માટેનો સૌથી મહત્વનો માર્ગ છે. અહીં થતી કોઈ પણ નાની લશ્કરી અથડામણ વૈશ્વિક ઊર્જા બજાર અને અર્થતંત્રમાં મોટી ઉથલપાથલ લાવી શકે છે.