આજથી સ્વિટ્ઝર્લેન્ડમાં મહિલાઓએ જાહેર સ્થળોએ હિજાબ, બુરખા અથવા અન્ય કોઈપણ માધ્યમથી તેમના ચહેરાને સંપૂર્ણપણે ઢાંકવા પર પ્રતિબંધ લાગુ કરી દીધો છે. આ કાયદાનું ઉલ્લંઘન કરવા પર 1000 સ્વિસ ફ્રેંક એટલે કે અંદાજે 96 હજાર રૂપિયા સુધીનો દંડ ફટકારવામાં આવશે.
2021માં સ્વિટ્ઝર્લેન્ડમાં યોજાયેલા જનમત સંગ્રહમાં 51.21 ટકા નાગરિકોએ બુરખા પર પ્રતિબંધ મૂકવાની તરફેણમાં મતદાન કર્યું હતું. આ પછી, બુરખા પર પ્રતિબંધને લઈને કાયદો બનાવવામાં આવ્યો, જે આજથી એટલે કે 1 જાન્યુઆરી 2025થી શરૂ થઈ રહ્યો છે.
સ્વિત્ઝર્લેન્ડ પહેલા બેલ્જિયમ, ફ્રાન્સ, ડેનમાર્ક, ઓસ્ટ્રિયા, નેધરલેન્ડ અને બલ્ગેરિયામાં પણ આ અંગેના કાયદાઓ બન્યા છે. આ કાયદા બાદ મહિલાઓ સાર્વજનિક ઓફિસો, પબ્લિક ટ્રાન્સપોર્ટ, રેસ્ટોરાં, દુકાનો અને અન્ય જગ્યાઓ પર પોતાનો ચહેરો સંપૂર્ણપણે ઢાંકી શકશે નહીં.
2022 માં, રાષ્ટ્રીય પરિષદે, સ્વિસ સંસદના નીચલા ગૃહ, ચહેરા ઢાંકવા પર પ્રતિબંધ મૂકવાના કાયદા પર મતદાન કર્યું. આ દરમિયાન 151 સભ્યોએ તરફેણમાં અને 29 સભ્યોએ વિરોધમાં મતદાન કર્યું હતું. જે બાદ આ અંગે કાયદો બનાવવામાં આવ્યો હતો.
આ દરખાસ્ત જમણેરી સ્વિસ પીપલ્સ પાર્ટી દ્વારા મૂકવામાં આવી હતી, જ્યારે કેન્દ્ર અને ગ્રીન્સ પક્ષો તેની વિરુદ્ધ હતા. કેટલાક લોકોનું કહેવું છે કે આ કાયદો અન્યાયી રીતે મુસ્લિમ મહિલાઓને નિશાન બનાવે છે. આ કાયદાનું સમર્થન કરનારા લોકો દાવો કરે છે કે જાહેર સ્થળોએ સાંસ્કૃતિક મૂલ્ય અને સુરક્ષા માટે આ જરૂરી પગલું છે.
લ્યુસર્ન યુનિવર્સિટીના 2021ના સંશોધન મુજબ, સ્વિટ્ઝર્લેન્ડમાં ભાગ્યે જ કોઈ બુરખો પહેરે છે. અહીં માત્ર 30 મહિલાઓ જ નકાબ પહેરે છે. 2021 સુધીમાં, સ્વિટ્ઝર્લેન્ડની 8.6 મિલિયનની વસ્તીમાંથી માત્ર 5 ટકા મુસ્લિમો હતા, જેમાંથી મોટા ભાગના તુર્કી, બોસ્નિયા અને કોસોવોના છે.
અગાઉ 2009માં જનમત સંગ્રહ દ્વારા જ મિનારાના નિમર્ણિ પર પ્રતિબંધ મૂકવામાં આવ્યો હતો. આ દરખાસ્ત પણ એસવીપી પક્ષ દ્વારા મૂકવામાં આવી હતી. આ પ્રસ્તાવમાં કહેવામાં આવ્યું હતું કે આ મિનારાઓ ઈસ્લામીકરણની નિશાની છે.
બુરખાએ એક પ્રકારનો પડદો છે, જે મોટાભાગે અફઘાનિસ્તાન અને દક્ષિણ એશિયાની મુસ્લિમ મહિલાઓ પહેરે છે. બુરખો એ કાપડનો એક ટુકડો છે, જે આખા શરીરને ઢાંકી દે છે. આમાં, સામાન્ય રીતે ચહેરાની નજીક માત્ર એક પાતળી જાળી હોય છે, જેના દ્વારા મહિલા બહાર જોઈ શકે છે.
જ્યારે યુરોપ અને ગલ્ફ દેશોમાં બુરખાને બદલે નકાબ વધુ લોકપ્રિય છે. નિકાબ પણ એક પ્રકારનો પડદો છે, જે સામાન્ય રીતે ચહેરાના માત્ર નીચેના અડધા ભાગને જ ઢાંકે છે અને આંખોની આસપાસનો વિસ્તાર ખુલ્લો રહે છે. માથું, કાન અને ગરદનને ઢાંકતા સ્કાર્ફને હિજાબ કહેવામાં આવે છે, જેમાં ચહેરો ખુલ્લો રહે છે. મોટાભાગના મુસ્લિમ દેશોમાં તેનો ઉપયોગ થાય છે.