રાજકોટના 150 ફૂટ રિંગ રોડ પર આવેલી પાયલ મેટરનિટી હોસ્પિટલમાં સગર્ભા અને અન્ય મહિલાઓના ચેકઅપના વીડિયો વાઇરલ થવાની ઘટનામાં પોલીસ યુટ્યુબ અને ટેલિગ્રામ ચેનલમાંથી આ વીડિયો ડિલિટી કરી રહી છે. પરંતુ આ વીડિયો હજુ ઇન્સ્ટાગ્રામમાં ફરી રહ્યા છે. આ અંગે પોલીસે ક્યારે કાર્યવાહી કરશે તે જોવાનું રહ્યું. 

ઇન્સ્ટાગ્રામમાં એક એકાઉન્ટમાં પાયલ મેટરનિટી હોસ્પિટલના સગર્ભાઓના ચેકઅપના વીડિયો પોસ્ટ કરવામાં આવ્યા છે. આ વીડિયો ડિસેમ્બર મહિનાથી પોસ્ટ થઈ રહ્યા છે. ત્યારે સવાલ એ થાય છે કે, પોલીસના ધ્યાને આ ઇન્સ્ટાગ્રામ એકાઉન્ટ હજુ સુધી કેમ ધ્યાને આવ્યું નથી. પોલીસે આ એકાઉન્ટધારકની સામે પણ કાર્યવાહી કરવી જોઈએ તેવી લોકોમાં માંગ ઉઠી છે.

શું છે સમગ્ર મામલો
ગુજરાતને શર્મસાર કરતી ઘટના હોસ્પિટલોમાં થતી હોવાનો પર્દાફાશ થયો છે. રાજકોટની પાયલ મેટરનિટી હોસ્પિટલમાં મહિલાઓના ચેકઅપના વીડિયો સોશિયલ મીડિયામાં વાઇરલ થતા ખળભળાટ મચી ગયો છે. મહિલાઓના ચેકઅપના વીડિયોને યુ-ટ્યુબ ચેનલ અને ટેલિગ્રામ ચેનલ બનાવી બતાવવાના ગોરખધંધાનો પર્દાફાશ થયો છે. સગર્ભાના ચેકઅપના વીડિયો યુ-ટ્યુબ ચેનલ અને ટેલિગ્રામ ચેનલનું સબસ્ક્રિપ્શનમાં મેમ્બરશિપ આપીને રૂપિયા કમાવવાના ગોરખધંધાનો પણ પર્દાફાશ થયો હોવાનું જાણવા મળ્યું છે.  આ હોસ્પિટલના ડોક્ટર અમિત અકબરીએ પણ મીડિયા સમક્ષ સ્વીકાર કર્યો છે કે, હા આ વીડિયો અમારી હોસ્પિટલના છે. વીડિયો કઈ રીતે વાઇરલ થયા એ અમને ખબર નથી.

અમદાવાદ સાયબર ક્રાઈમે આ વાતને એટલી ગંભીરતાથી લીધી છે કે, સાયબર ક્રાઈમ હવે સરકાર પાસે માગણી મૂકશે કે, હોસ્પિટલો અને જાહેર સ્થળોએ જ્યાં પ્રાઈવસી હોય તેવી જગ્યાઓ માટે સીસીટીવી લગાવવાની અને તેને સેઈફ રાખવાની ચોક્કસ ગાઈડ લાઈન બનાવે.

રાજકોટની હોસ્પિટલના જ સીસીટીવી હોવાનો ખ્યાલ કેવી રીતે આવ્યો?
સૌથી પહેલાં આ આપત્તિજનક વીડિયો ક્લિપ સોશિયલ મીડિયા પર વાઇરલ થઈ હતી. એટલે ટૂંકાગાળામાં જ ઘણા બધા લોકો સુધી પહોંચી ગઈ હતી. એક યુવકના ધ્યાને આ વીડિયો આવતાં તેના મનમાં સવાલો ઉઠ્યા હતા અને પોતાના મિત્ર સાગર પટોળિયાને વાઇરલ વીડિયો વિશે જાણ કરી હતી. સાગરે આ વીડિયો ક્યાંનો છે, કોણે અપલોડ કર્યા હોય શકે એ બાબતે તપાસ કરી પરંતુ કાંઈ ખાસ સફળતા ન મળી. આખરે સાગર પટોળિયાએ અમદાવાદ સાયબર ક્રાઇમને એક્સ (ટ્વીટર) પર ટેગ કરીને વાઇરલ વીડિયો બાબતે તપાસ કરવા ધ્યાન દોર્યું હતું.

આ રીતે પાયલ હોસ્પિટલ રડારમાં આવી
જ્યારે અમદાવાદ સાયબર ક્રાઇમ સમક્ષ આ ઘટના આવી તો તેમણે વીડિયોનું પ્રાથમિક તબક્કે એનાલિસિસ કર્યું. એ દરમિયાન અમુક મુદ્દા ધ્યાને આવ્યા. જેમ કે વાઇરલ સીસીટીવી ફૂટેજમાં લોકો ગુજરાતી બોલતા હતા. એટલે સાયબર ક્રાઇમને આ ઘટનાની ગંભીરતા તેમજ સંવેદનશીલતાનો અંદાજો આવી ગયો. તેમણે તરત જ ફરિયાદ નોંધીને સત્તાવાર રીતે તપાસ શરૂ કરી દીધી હતી. અમદાવાદ સાયબર ક્રાઇમની ટીમે તમામ સીસીટીવી મેળવીને ડિટેલ્ડ એનાલિસિસ શરૂ કર્યું, તેમાં નોંધ્યું કે આ સીસીટીવી ફૂટેજમાં જોવા મળતા દર્દી અને હોસ્પિટલ સ્ટાફ સૌરાષ્ટ્રના લહેકામાં ગુજરાતી ભાષા બોલી રહ્યા છે. એટલું જ નહીં, વીડિયોમાં ‘ડૉક્ટર સાહેબ અમિત’ તેમજ કેટલીક નર્સના નામ પણ સંભળાયા. જેથી ડૉક્ટર અમિત સૌરાષ્ટ્રની કઈ હોસ્પિટલમાં સેવા આપે છે એ શોધખોળ અમદાવાદ સાયબર ક્રાઇમે શરૂ કરી. આ રીતે પાયલ હોસ્પિટલ રડારમાં આવી.

સીસીટીવી ફૂટેજમાં ઘણી વસ્તુ મળતી આવતી હતી
રાજકોટની પાયલ હોસ્પિટલે પોતાના સારા કામના પ્રમોશનલ વીડિયો સોશિયલ મીડિયા પર મૂક્યા હતા. જે અમદાવાદ સાયબર ક્રાઇમની ટીમના ધ્યાને આવી ગયા. કારણ કે પાયલ હોસ્પિટલના પ્રમોશનલ વીડિયો અને વાઇરલ થયેલા સીસીટીવી ફૂટેજમાં ઘણી વસ્તુ મળતી આવતી હતી. એટલે અમદાવાદ સાયબર ક્રાઈમે રાજકોટની સ્થાનિક પોલીસની મદદની કેટલાક મુદ્દાની ખરાઈ કરાવી. આમ, અંતે ખબર પડી ગઈ કે મહિલાઓના આપત્તીજનક સીસીટીવી ફૂટેજ વાઇરલ થયા છે એ રાજકોટની પાયલ હોસ્પિટલના જ છે.