સૌરાષ્ટ્રમાં ભારે વરસાદના પગલે ઉપલેટાનાં વેણુ- 2 ડેમનાં 8 દરવાજા 4 ફૂટ ખોલવામાં આવ્યા છે. આ સાથે જ હેઠવાસના ગામોને સાવચેત રહેવા સુચના પણ આપી દેવામાં આવી છે.

રાજકોટ જિલ્લાના ઉપલેટા તાલુકાના ગધેથડ ગામ પાસેનો સિંચાઈ યોજના નંબર ૧૫૩ વેણુ - ૨ ડેમમાં ભારે વરસાદને કારણે પાણીની આવક સતત વધી રહી હોવાથી ડેમનાં ૮ દરવાજા ૪ ફૂટ ખોલવામાં આવ્યા છે. ડેમમાં હાલ ૩૪૪૪ ક્યુસેક પ્રવાહની આવક છે. હાલમાં ડેમમાં ૨૦૭૦૪ ક્યુસેક આવકની સામે ૨૦૭૦૪ ક્યુસેક પ્રવાહ છોડવામાં આવી રહ્યો હોવાથી ડેમની હેઠવાસમાં આવેલા ઉપલેટા તાલુકાના ગધેથડ, વરજાંગજાળીયા, મેખાટીંબી, નાગવદર અને નિલાખા ગામોના લોકોને નદીના પટમાં કે કાંઠા વિસ્તારમાં અવરજવર નહિ કરવા તેમજ સાવચેત રહેવા રાજકોટ ફ્લડ સેલની યાદીમાં જણાવ્યું છે.