ખંભાળિયા - જામનગર હાઈવે પર અત્રેથી આશરે 17 કિલોમીટર દૂર દેવળિયા ગામ નજીક પૂરઝડપે અને બેફિકરાઈપૂર્વક આવી રહેલા એમ.પી. 09 એચ.એચ. 3417 નંબરના એક ટ્રકના ચાલકે આ માર્ગ પર જઈ રહેલા એક આશરે 30 વર્ષના એક અજાણ્યા યુવાનને અડફેટે લેતા તેને ફ્રેકચર સહિતની ઈજાઓ સાથે હોસ્પિટલમાં ખસેડવામાં આવ્યો હતો. આ બનાવ અંગે સોઢા તરઘડી ગામના અનિરુદ્ધસિંહ જાડેજાની ફરિયાદ પરથી ખંભાળિયા પોલીસે ટ્રકના ચાલક ઈમરાનશાહ આલમશાહ સામે ગુનો નોંધી, જરૂરી કાર્યવાહી કરી હતી.

ખંભાળિયા નજીક યુવાનના રોકડ, દસ્તાવેજોની ચોરી

રાજસ્થાન રાજ્યના રાજસમદ જિલ્લાના મૂળ વતની અને હાલ કલ્યાણપુર તાલુકાના નંદાણા ગામે રહેતા સંપતપુરી મંગુપુરી ગોસ્વામી નામના 45 વર્ષના યુવાને ખંભાળિયા નજીક મોવાણ ગામના પાટીયા પાસે આવેલી એક હોટલ નજીક પોતાની ટાટા વેન્ચર કારમાં રાખેલા રૂપિયા 49,000 રોકડા તેમજ આધાર કાર્ડ, વાહનની આરસી બુક વિગેરે ચીજ વસ્તુઓ કોઈ અજાણ્યો શખ્સ ચોરી કરીને લઈ ગયો હોવાની ફરિયાદ અહીંના પોલીસ મથકમાં નોંધાવવામાં આવી છે. જે અંગે પોલીસે ધોરણસર ગુનો નોંધી, ચોર ઈસમની શોધખોળ હાથ ધરી છે.

દ્વારકામાં વિપ્ર મહિલાનો મોબાઈલ ચોરાયો

દ્વારકાના નાના ભાવડા ગામે રહેતા રાજેશભાઈ વાલાભાઈ બુજડ નામના 39 વર્ષના બ્રાહ્મણ યુવાનના ધર્મ પત્ની મંજુલાબેનનો રૂપિયા 16,000 ની કિંમતનો રીયલ-મી કંપનીનો મોબાઈલ ફોન કોઈ ગઠિયાઓ ભાથાણ ચોકમાંથી સેરવી ગયાની ફરિયાદ દ્વારકા પોલીસ મથકમાં નોંધાવવામાં આવી છે.