બેંગલુરુના ચિન્નાસ્વામી સ્ટેડિયમ બહાર RCBની જીતની ઉજવણીમાં થયેલી ભાગદોડમાં 11 લોકોના મોત થયા. આ પછી હવે કબન પાર્ક પોલીસ સ્ટેશનમાં RCB મેનેજમેન્ટ, DNA (ઇવેન્ટ મેનેજમેન્ટ કંપની) અને KSCA (કર્ણાટક સ્ટેટ ક્રિકેટ એસોસિએશન) વિરુદ્ધ FIR દાખલ કરવામાં આવી છે. પોલીસે પહેલા આ કેસ UDR (અપ્રાકૃતિક મૃત્યુ) માં દાખલ કર્યો હતો, પરંતુ જનતા અને મીડિયાના દબાણ બાદ ૨૪ કલાકની અંદર આ FIR દાખલ કરવામાં આવી છે.

બેંગલુરુના એમ. ચિન્નાસ્વામી સ્ટેડિયમ બહાર રોયલ ચેલેન્જર્સ બેંગલુરુ (RCB) ની IPL જીતની ઉજવણી દરમિયાન મચેલી ભાગદોડે સમગ્ર દેશને હચમચાવી દીધો છે. આ દુર્ઘટનામાં ૧૧ લોકોના જીવ ગયા અને ૪૭થી વધુ લોકો ઘાયલ થયા. આ મામલે હવે કબન પાર્ક પોલીસ સ્ટેશનમાં FIR દાખલ કરવામાં આવી છે. RCB મેનેજમેન્ટને પ્રથમ આરોપી, ઇવેન્ટ મેનેજમેન્ટ કંપની DNA ને બીજો આરોપી અને કર્ણાટક સ્ટેટ ક્રિકેટ એસોસિએશન (KSCA) ના પદાધિકારીઓને ત્રીજા આરોપી માનીને FIR દાખલ કરવામાં આવી છે.

પોલીસે આ મામલે કલમ-૧૦૫, ૧૧૫ અને ૧૧૮ હેઠળ FIR દાખલ કરી

કલમ ૧૦૫: આ કલમ ત્યારે લાગુ પડે છે જ્યારે કોઈની બેદરકારી કે બિન-ઇરાદાપૂર્વકની ક્રિયાથી મૃત્યુ થાય, પરંતુ તે હત્યાની શ્રેણીમાં આવતું નથી. આ કિસ્સામાં, આયોજકો પર આરોપ છે કે તેમની બેદરકારીથી ભાગદોડ થઈ, જેના કારણે ૧૧ લોકોના જીવ ગયા.

કલમ ૧૧૫: આમાં જ્યારે કોઈ વ્યક્તિ ઇરાદાપૂર્વક કોઈને ઈજા પહોંચાડે છે. આ દુર્ઘટનામાં ભીડના વ્યવસ્થાપનમાં કમીને કારણે ઘણા લોકો ઘાયલ થયા, જેના માટે આ કલમ ઉમેરવામાં આવી છે.

કલમ ૧૧૮: આમાં જ્યારે ખતરનાક રીતો કે સાધનોથી કોઈને ગંભીર ઈજા પહોંચે છે. ભાગદોડમાં અવ્યવસ્થાને આ કલમ હેઠળ જોવામાં આવી.

મીડિયાના રિપોર્ટની મોટી અસર
મીડિયાના રિપોર્ટે મામલાને રાષ્ટ્રીય સ્તર સુધી પહોંચાડ્યો. આ રિપોર્ટમાં જણાવવામાં આવ્યું કે કેવી રીતે ભીડ વ્યવસ્થાપનમાં કમી, મફત પાસ અને મર્યાદિત બેઠકોએ આ દુર્ઘટનાને જન્મ આપ્યો. આ ખબર પછી પોલીસે પહેલા અપ્રાકૃતિક મૃત્યુ (UDR) નો કેસ દાખલ કર્યો હતો, પરંતુ ભારે દબાણ અને જનતાના આક્રોશ બાદ ૨૪ કલાકમાં RCB, DNA અને KSCA વિરુદ્ધ પણ FIR દાખલ કરવામાં આવી.

શું થયું હતું દુર્ઘટનાના દિવસે?
૩ જૂનના રોજ RCB એ અમદાવાદમાં પંજાબ કિંગ્સને હરાવીને પોતાની પહેલી IPL ટ્રોફી જીતી હતી. તેના બીજા દિવસે બેંગલુરુમાં વિક્ટરી પરેડનું આયોજન કરવામાં આવ્યું. ચિન્નાસ્વામી સ્ટેડિયમ બહાર લાખો ચાહકો પોતાના ફેવરિટ ખેલાડીઓને જોવા માટે એકઠા થઈ ગયા પરંતુ આયોજકોએ ભીડને નિયંત્રિત કરવામાં બેદરકારી દાખવી, જેનાથી આ દર્દનાક દુર્ઘટના થઈ.

આરોપ અને કાર્યવાહી
FIR માં RCB મેનેજમેન્ટ, DNA ઇવેન્ટ મેનેજમેન્ટ કંપની અને KSCA પર ગુનાહિત બેદરકારીનો આરોપ છે. કર્ણાટક હાઇ કોર્ટે પણ આ મામલાનું સ્વતઃ સંજ્ઞાન લેતા સરકાર પાસેથી જવાબ માંગ્યો છે. RCB એ મૃતકોના પરિવારોને ૧૦-૧૦ લાખ રૂપિયાની આર્થિક સહાય આપવાની ઘોષણા કરી છે, જ્યારે સરકારે ઘાયલોના મફત ઇલાજનું વચન આપ્યું છે.