રશિયા અને યુક્રેન વચ્ચે ચાલી રહેલા યુદ્ધમાં પ્રથમ વખત યુક્રેને રશિયા પર ATACMS મિસાઈલથી હુમલો કર્યો છે. યુએસ પ્રમુખ જો બાઈડેનની અધિકૃતતા પછી પ્રથમ વખત યુક્રેનિયન સૈન્યએ રશિયાની અંદર હુમલો કરવા માટે યુએસ લાંબા અંતરની ATACMS મિસાઇલોનો ઉપયોગ કર્યો.

આરબીસી યુક્રેનના જણાવ્યા મુજબ કથિત હુમલો રશિયાની અંદરના હુમલાઓ માટે લાંબા અંતરના યુએસ શસ્ત્રોનો ઉપયોગ બાઈડેન દ્વારા અધિકૃત કર્યાના બે દિવસ પછી થયો હતો. ડેઈલી ટેલિગ્રાફ અનુસાર તનાવ વધવાના ડરથી મહિનાઓ સુધી બાઈડેને યુક્રેનને આવા હુમલા કરવાની મંજૂરી આપવાનો ઇનકાર કર્યો હતો, પરંતુ રશિયાએ ઉત્તર કોરિયાના 10,000 સૈનિકોને ઉમેર્યા પછી બાઈડેને પોતાનો વિચાર બદલી નાખ્યો હતો.

શા માટે જો બાઈડેને યુક્રેનને લાંબા અંતરની મિસાઇલો છોડવાની આપી મંજૂરી?

અખબારે અહેવાલ આપ્યો છે કે બાઈડેને યુક્રેન સામેના રશિયાના યુદ્ધમાં ઉત્તર કોરિયાની તૈનાતીને એક એવી સ્થિતિ તરીકે જોઈ હતી કે રશિયાની અંદર આવી લાંબા અંતરની મિસાઈલોનો ઉપયોગ કરવા માટે પરવાનગી જરૂરી છે. આરબીસી યુક્રેન ન્યૂઝ એજન્સીએ એક સ્ત્રોતને ટાંકીને જણાવ્યું હતું કે રશિયાના બ્રાયન્સ્ક ક્ષેત્રમાં કારાચેવમાં એક નિશાન પર સફળતાપૂર્વક હુમલો કરવામાં આવ્યો હતો.

રશિયન તોપખાનાને બનાવાયા નિશાન

સૂત્રોના જણાવ્યા પ્રમાણે "અમે પ્રથમ વખત એટીએસીએમએસનો ઉપયોગ રશિયન પ્રદેશ પર હુમલો કરવા માટે કર્યો હતો. આ હુમલો બ્રાયન્સ્ક ક્ષેત્રમાં એક સુવિધા પર કરવામાં આવ્યો હતો અને તેને સફળતાપૂર્વક નિશાન બનાવવામાં આવ્યો હતો" એજન્સીએ એમ પણ કહ્યું કે ઘટના સ્થળેથી મેળવેલા સોશિયલ મીડિયા ફૂટેજમાં એક વિશાળ આગ દેખાઈ રહી છે. એજન્સીએ વધુમાં કહ્યું કે આ હુમલાનું લક્ષ્ય રશિયન સેનાના મુખ્ય મિસાઈલ અને આર્ટિલરી ડિરેક્ટોરેટની 67મી શસ્ત્રાગાર હતી.