ભારતીય અબજોપતિ ગૌતમ અદાણી અને તેમના ભત્રીજા સાગર અદાણી વિરુદ્ધ કથિત લાંચ કેસમાં એક નવો ખુલાસો થયો છે. અમેરિકન રેગ્યુલેટર દ્વારા કોર્ટમાં દાખલ કરાયેલી અરજીમાં કહેવામાં આવ્યું છે કે હવે યુએસ સેક્રેટરીએ આ મામલાની તપાસ માટે ભારત પાસેથી મદદ માંગી છે. રિપોર્ટ અનુસાર, યુએસ રેગ્યુલેટરે ન્યૂયોર્ક ડિસ્ટ્રિક્ટ કોર્ટને જણાવ્યું છે કે ગૌતમ અદાણી અને સાગર અદાણીને તેમની ફરિયાદ મોકલવાના પ્રયાસો ચાલી રહ્યા છે. નોંધનીય છે કે આ સમગ્ર મામલો 265 મિલિયન ડોલર (લગભગ 2029 કરોડ રૂપિયા)નો છે.

એક અહેવાલ મુજબ, યુએસ સિક્યોરિટીઝ એન્ડ એક્સચેન્જ કમિશને અબજોપતિ ગૌતમ અદાણી અને તેમના ભત્રીજા સાગર અદાણી સામે 265 મિલિયન યુએસ ડોલરના કથિત છેતરપિંડી અને લાંચના કેસની તપાસમાં ભારત સરકાર પાસેથી સહાયની વિનંતી કરી છે. ગયા વર્ષે નવેમ્બર 2024 માં, યુએસ રેગ્યુલેટરે ગૌતમ અદાણી અને અન્ય લોકો પર 2020-2024 વચ્ચે રાજ્ય વીજ વિતરણ કંપનીઓ સાથે સૌર ઉર્જા કરાર મેળવવા માટે અધિકારીઓને $265 મિલિયન લગભગ રૂ. 2,029 કરોડની લાંચ આપવાનો આરોપ મૂક્યો હતો. કોર્ટમાં દાખલ કરાયેલી અરજીમાં, યુએસ સેક્રેટરીએ ન્યૂયોર્ક ડિસ્ટ્રિક્ટ કોર્ટને જણાવ્યું છે કે ગૌતમ અદાણી અને સાગર અદાણીને તેમની ફરિયાદ મોકલવાના પ્રયાસો ચાલી રહ્યા છે. આ માટે ભારતના કાયદા અને ન્યાય મંત્રાલય પાસેથી મદદ માંગવામાં આવી છે.

અદાણી પર આ છે આરોપો

અમેરિકામાં, સિક્યોરિટીઝ એન્ડ એક્સચેન્જ કમિશનએ ગૌતમ અદાણીના ભત્રીજા સાગર અદાણી, અદાણી ગ્રીન એનર્જી લિમિટેડના અધિકારીઓ અને બીજી કંપની એઝ્યુર પાવર ગ્લોબલ લિમિટેડના એક્ઝિક્યુટિવ સિરિલ કેબેન્સ સામે પણ આરોપો દાખલ કર્યા છે. રિપોર્ટમાં કહેવામાં આવ્યું છે કે ગૌતમ અદાણી અને તેમના ભત્રીજા સાગર, સાત અન્ય પ્રતિવાદીઓ સાથે, તેમની નવીનીકરણીય ઉર્જા કંપની માટે કોન્ટ્રાક્ટ મેળવવા અને ભારતના સૌથી મોટા સૌર ઉર્જા પ્લાન્ટ પ્રોજેક્ટ વિકસાવવા માટે ભારતીય સરકારી અધિકારીઓને લગભગ $265 મિલિયનની લાંચ આપવા સંમત થયા હતા.આ સાથે, યુએસ સેક્રેટરીએ અદાણી ગ્રીન એનર્જી લિમિટેડના સ્થાપક ગૌતમ અદાણી અને તેમના ભત્રીજા સાગર અદાણી પર કરોડો ડોલરની લાંચ વિશે રોકાણકારોથી માહિતી છુપાવવાનો પણ આરોપ મૂક્યો હતો.

અદાણી ગ્રુપે આરોપોને ફગાવ્યા

ભૂતપૂર્વ યુએસ રાષ્ટ્રપતિ જો બિડેનના વહીવટ દરમિયાન લાગેલા આ આરોપો પર સ્પષ્ટતા આપતા, અદાણી ગ્રુપે તેમને પાયાવિહોણા ગણાવ્યા હતા. જૂથ દ્વારા આપવામાં આવેલા સ્પષ્ટીકરણમાં કહેવામાં આવ્યું હતું કે, 'આ આરોપો પાયાવિહોણા છે. જો કે, આ ફક્ત આરોપો છે; દોષિત સાબિત ન થાય ત્યાં સુધી આરોપી નિર્દોષ માનવામાં આવે છે. શક્ય તમામ કાનૂની પગલાં લેવામાં આવશે. કંપની દ્વારા જારી કરાયેલા એક નિવેદનમાં કહેવામાં આવ્યું છે કે અદાણી ગ્રુપે હંમેશા તમામ ક્ષેત્રોમાં પારદર્શિતા અને નિયમનકારી નિયમોનું પાલન કર્યું છે અને તે કરવાનું ચાલુ રાખશે.

ટ્રમ્પ આવતાની સાથે જ મોટી રાહત

તાજેતરમાં ડોનાલ્ડ ટ્રમ્પના અમેરિકાના રાષ્ટ્રપતિ બનતાની સાથે જ ગૌતમ અદાણી માટે રાહતના સમાચાર આવ્યા છે. વાસ્તવમાં, યુએસ રાષ્ટ્રપતિએ યુએસ ન્યાય વિભાગના ફોરેન કરપ્ટ પ્રેક્ટિસ એક્ટ 1977 ને નાબૂદ કરવાનો આદેશ આપ્યો હતો. આ એક એવો કાયદો છે જેના હેઠળ વ્યવસાયમાં લાંચ લેવા કે આપવા સામે કાર્યવાહી કરવામાં આવી હતી. આનો અર્થ એ થયો કે આવા કેસમાં આરોપીઓ સામેનો કેસ બંધ થઈ જશે.આ ૫૦ વર્ષ જૂના કાયદાને નાબૂદ કરવાથી, ભારતીય ઉદ્યોગપતિ ગૌતમ અદાણીને પણ મોટી રાહત મળવાની અપેક્ષા હતી, કારણ કે આ કાયદા હેઠળ તેમની સામે કાર્યવાહી કરવામાં આવી રહી હતી.