અમેરિકાએ ભારતમાં 2000 વિઝા ઇન્ટરવ્યુ એપોઇન્ટમેન્ટ રદ કરી છે. વિઝા ઇન્ટરવ્યુની તારીખો અવરોધિત કરનારા 'બોટ્સ' સામે અમેરિકાએ કાર્યવાહી કરી છે. આના કારણે ઘણા અરજદારોને તેમની સૂચિત મુલાકાત માટે સમયસર વિઝા મેળવવા માટે એજન્ટોને પ્રતિ વ્યક્તિ આશરે 30,000-35,000 રૂપિયા ચૂકવવા સિવાય કોઈ વિકલ્પ રહેતો નથી.

ભારતમાં યુએસ દૂતાવાસે ગઈકાલે જણાવ્યું હતું કે ભારતીય કોન્સ્યુલેટ ટીમ બોટ્સ દ્વારા કરવામાં આવેલી લગભગ 2,000 વિઝા એપોઇન્ટમેન્ટ રદ કરી રહી છે. યુએસ દૂતાવાસે વધુમાં કહ્યું કે અમારી શેડ્યુલિંગ નીતિઓનું ઉલ્લંઘન કરતા એજન્ટો અને ફિક્સરો માટે અમે ઝીરો ટોલરન્સ રાખીએ છીએ. તાત્કાલિક અસરથી અમે આ એપોઇન્ટમેન્ટ્સ રદ કરી રહ્યા છીએ અને સંબંધિત એકાઉન્ટ્સ માટે શેડ્યૂલિંગ વિશેષાધિકારો સ્થગિત કરી રહ્યા છીએ.

પોસ્ટમાં આગળ કહેવામાં આવ્યું છે કે અમે અમારા છેતરપિંડી વિરોધી પ્રયાસો ચાલુ રાખીશું. છેતરપિંડી માટે અમારી પાસે ઝીરો ટોલરન્સ છે. ટ્રાવેલ ઉદ્યોગમાં એ એક ઓપન સિક્રેટ છે કે યુએસ વિઝા - બિઝનેસ અને વિઝિટર બી1/બી2 અને વિદ્યાર્થી - માટે એપોઇન્ટમેન્ટ તારીખો માટે લાંબો સમય રાહ જોવી પડે છે પરંતુ એજન્ટને પૈસા ચૂકવવાથી જાદુઈ રીતે એક મહિના કે તેથી ઓછા સમયમાં સ્લોટ મળી જાય છે.

નામ ન આપવાની શરતે એક વ્યક્તિએ કહ્યું હતું કે અમે અમારા બાળક માટે વિઝા ઇન્ટરવ્યૂની તારીખ મેળવવાનો પ્રયાસ કર્યો, જેને ગયા વર્ષે અમેરિકન યુનિવર્સિટીમાં પ્રવેશ મળવાનો હતો પરંતુ તે સમયે ઉપલબ્ધ નહોતું. અમે એક એજન્ટને ૩૦,૦૦૦ રૂપિયા ચૂકવ્યા અને તેણે સમય મેળવી દીધો. તેવી જ રીતે, બી1/બી2 માટે છ મહિનાથી વધુ રાહ જોવી પડે છે પરંતુ 30-35 હજાર રૂપિયા ચૂકવવાનો અર્થ એ છે કે એક મહિનામાં કે તેનાથી પણ ઓછા સમયમાં વિઝા મળી જશે.

સૂત્રો કહે છે કે એજન્ટો એપોઇન્ટમેન્ટની તારીખો બ્લોક કરવા માટે બોટ્સનો ઉપયોગ કરે છે. આ કારણે, જ્યારે અરજદારો પોતે એપોઇન્ટમેન્ટ બુક કરવાનો પ્રયાસ કરે છે ત્યારે તેમને નજીકના ભવિષ્યમાં કોઈ ઉપલબ્ધતા દેખાતી નથી. જ્યારે 2023 માં બી1/બી2 એપોઇન્ટમેન્ટ માટે રાહ જોવાનો સમયગાળો 999 દિવસ જેટલો હતો ત્યારે અમેરિકાએ ફ્રેન્કફર્ટ અને બેંગકોકમાં તેના કોન્સ્યુલેટમાં ભારતીય અરજદારો માટે એપોઇન્ટમેન્ટ ખોલવી પડી હતી.

ભારતે 2-3 વર્ષ પહેલા અમેરિકા સમક્ષ વિઝા માટે લાંબા સમય સુધી રાહ જોવાનો મુદ્દો પણ ઉઠાવ્યો હતો. વેઇટિંગ ટાઇમ ઘટાડવા માટે અમેરિકાએ ઘણા પગલાં લીધાં. હવે, અમેરિકા દ્વારા બોટ્સ પર કડક કાર્યવાહી કરવામાં આવી રહી છે, તેથી પરિસ્થિતિમાં વધુ સુધારો થઈ શકે છે.