બનાવની જાણવા મળતી વિગતો મુજબ, ગોંડલના બંધિયા ગામે રહેતા દિનેશભાઇ હીરાભાઇ રાઠોડ(ઉ.વ ૪૫) નામના ખેડૂતે ગોંડલ તાલુકા પોલીસ મથકમાં નોંધાવેલી ફરિયાદમાં જણાવ્યું હતું કે, તા. ૨૨ ના સાંજના પાંચેક વાગ્યે તે ગામની સીમમાં આવેલી વાડીએ કપાસની સાઠી ઉપાડતા હતા ત્યારે બાજુની વાડીમાં કામ કરનાર બે છોકરા બાઇક લઇને આવ્યા હતાં.જેથી ખેડૂતની વાડીમાં રહેલી પાણી પીવડાવવાની પ્લાસ્ટિકની પાઇપ તુટી જતા તેમણે આ બંનેને કહ્યું હતું કે, અમારી વાડીમાં શું કામ બાઇક ચલાવો છો જેથી તેણે કહ્યું હતું કે,સવારે તમને જોઇ લઇશું.

થોડીવાર બાદ આ બંને ફરી અહીં આવ્યા હતા અને કહેવા લાગ્યા હતા કે, તમારી વાડીમાંથી ચાલવાની કેમ ના પાડો છો? તેમ કહી ગાળો આપી ધમકી આપવા લાગ્યા હતાં. આ સમયે આ બંને જયા કામ કરે છે તેના વાડીમાલિક અજયસિંહ વાઘેલા પણ હાજર હોય તેણે કહ્યું હતું કે, શું માથાકૂટ કરો છો? જેથી ખેડૂતે કહ્યું હતું કે આ બંનેએ પ્લાસ્ટિકની પાઇપ તોડી નાખી હતી તેમ કહેતા આ બંનેમાંથી એક ધોકો લઇ આવી ખેડૂતને મારવા દોડયો હતો.જોકે અજયસિંહ વચ્ચે પડી તેને અટકાવ્યો હતો.બાદમાં ખેડૂતે ૧૦૦ નંબર પર ફોન કરી દીધા બાદ આ બંને શખસો વિરૂધ્ધ ફરિયાદ નોંધાવી છે.