રાજકોટ રેલવે સ્ટેશન પર બરૌની- રાજકોટ એક્સપ્રેસ ટ્રેનમાં બિન વારસી હાલતમાં પડેલી પ્લાસ્ટિકની થેલીમાંથી દેશી બનાવટનો તમંચો અને બે કારતુસ મળી આવ્યા હતા. જે રેલવે એસ.ઓ.જી.ની ટીમે કબજે કરી ટ્રેનમાં હથિયાર સાથે મુસાફરી કરનાર અજાણ્યા મુસાફરને ઝડપી લેવા તપાસ હાથ ધરી છે.
જાણવા મળતી વિગતો મુજબ, પશ્ચિમ રેલવે પોલીસના અધિક પોલીસ મહા નિર્દેશક પરીક્ષિતા રાઠોડ, એસ.પી બલરામ મીણા, ઇન્ચાર્જ વિભાગીય પોલીસ અધિકારી રાજકોટ એસ.આર. પટેલ, પીઆઈ વી.એન. સિંગરખીયા તથા એચ.કે. શ્રીમાલીના માર્ગદર્શન અને પીએસઆઇ બી.પી.વેડગાની રાહબરી હેઠળ રેલવે એસઓજીની ટીમ રેલવે સ્ટેશન વિસ્તારમાં હથિયારધારા તથા નાર્કોટિક્સના કેસો શોધી કાઢવા માટે તપાસમાં હતી.
દરમિયાન રાજકોટ રેલવે એસસોજીના હેડ કોન્સ્ટેબલ સિધ્ધરાજસિંહ જાડેજા અને હિતેશભાઈ તથા ટીમ રેલ્વે સ્ટેશનને આવતી જતી ટ્રેનોમાં ચડતા-ઉતરતા પેસેન્જર ઉપર વોચ રાખી હતી. આ સમયે ટ્રેન નંબર 09570 બરોની રાજકોટ- બરૌની એક્સપ્રેસ ટ્રેનના એસ/5 અને એસ/6 બંને કોચની વચ્ચે કોરિડોરમાં નીચે એક બિનવારસી સફેદ પ્લાસ્ટિકની થેલી શંકાસ્પદ નજરે પડતા આ બાબતે સફાઈ કામદારે પોલીસને જાણ કરી હતી. જેથી તુરંત અહીં પહોંચી આ શંકાસ્પદ થેલી ખોલી તેમાં તપાસ કરતા તેમાંથી દેશી બનાવટનો તમંચો અને બે કારતુસ મળી આવ્યા હતા. જેથી પોલીસે આ બંને કબજે કરી અહીં થેલીમાં હથિયાર સાથે મુસાફરી કરનાર અજાણ્યા મુસાફરને શોધી કાઢવા માટે તપાસ હાથ ધરી છે.