પોલીસ સૂત્રોમાંથી મળતી વિગતો મુજબ રાજકોટ રેન્જ આઇજી અશોકકુમાર યાદવ, એસપી વિજયસિંહ ગુર્જર દ્વારા ગ્રામ્ય વિસ્તારમાં દારૂ-જુગારની ગેરકાયદે પ્રવૃત્તિને નેસ્ત નાબૂદ કરવા 'ઝીરો ટોલરન્સ ટુ પ્રોહીબીશન ઇન્ફેકશન ગેમ્બલિંગ'ની નીતિ હેઠળ કાર્યવાહી કરવાની આપેલ સૂચનાથી રૂરલ એલસીબી પીઆઈ વી વી ઓડેદરાની રાહબરીમાં પીએસઆઇ એચ સી ગોહિલ અને આર વી ભીમાણી અલગ અલગ ટીમમાં પેટ્રોલિંગમાં હતી.

તે દરમિયાન એએસઆઇ શક્તિસિંહ જાડેજા, વિજયસિંહ જાડેજા, હેડ કોન્સ્ટેબલ કૌશિકભાઈ જોશી અને અરવિંદસિંહ જાડેજાને મળેલી સંયુક્ત હકીકતના આધારે ઉપલેટાના કોલકી રોડ આદર્શ સોસાયટીમાં જવાના રસ્તેથી બે શખ્સોને કારમાં વિદેશી દારૂની હેરાફેરી કરતા ઝડપી લેવાયા હતા.

રૂરલ એલસીબીની ટીમે રૂ.62,740 ની કિંમતની દારૂની 207 બોટલ, બે મોબાઈલ ફોન અને કાર મળી કુલ રૂ.6,02,740 ના મુદ્દામાલ સાથે અજીત દિનેશ માંકડ (રહે. ઉપલેટા બસ સ્ટેન્ડ પાછળ, આદર્શ સોસાયટી શેરી નં.-3) અને કિશન સંગ્રામભાઈ સોલંકી (રહે. સ્વામિનારાયણ સોસાયટી, ભગવતી પાર્ક-1, ઉપલેટા)ની ધરપકડ કરવામાં આવી હતી.

હવે ઝડપાયેલા શખ્સો દારૂનો જથ્થો ક્યાંથી લાવ્યા હતા અને કોને આપવાનો છે તે સહીતની બાબાતોની તપાસ માટે રૂરલ એલસીબી ટીમે રિમાન્ડ મેળવવા તજવીજ હાથ ધરી છે.