ભાવનગર જિલ્લામાં હળવા વરસાદની આગાહી વચ્ચે મંગળવારે બપોરથી સાંજ સુધીમાં ગારિયાધારમાં  ધોધમાર અઢી ઈંચ વરસાદ ખાબક્યો હતો. આથી ઠેર ઠેર પાણી ભરાયાં હતાં.ભાવનગર શહેર અને ઘોઘામાં પા ઈંચ વરસાદ પડયો હતો.જ્યારે જેસર અને પાલીતાણામાં ઝાપટા પડ્યા હતા.પાંચ તાલુકામાં મેઘવિરામ રહયો હતો.ગ્રામ્ય પંથકોમાં પણ સારા પ્રમાણમાં વરસાદ પડ્યો હતો.
  આ વર્ષે ગારિયાધારમાં મેઘકૃપા સારી રહી છે . બપોર બાદ  શરૂ થયેલા ધોધમાર વરસાદથી  સાંજ સુધીમાં અઢી ઈંચ પાણી વરસી ગયું હતું.આથી ઠેર ઠેર પાણી ભરાયુ હતું.ગારિયાધારમાં આ વર્ષે અત્યાર સુધીમાં કુલ ૧૯ ઈંચ ઉપરાંત વરસાદ પડ્યો છે.ગારિયાધારના ગ્રામ્ય પંથકો ગુજરડા, રૂપાવટી, સમઢિયાળા, પાલડી,પરવડીમાં પણ સારા પ્રમાણમાં વરસાદ પડયો હતો. 
  ભાવનગર શહેરમાં મંગળવારે વારે સાંજે હળવા ભારે ઝાપટાં પડ્યાં હતા.આથી પા ઇંચ વરસાદ પડયો હતો.શહેરના કેટલાક પરા વિસ્તારોમાં ધોધમાર વરસાદ પડ્યો હતો.ઘોઘામાં પણ સાંજના સુમારે મેઘસવારી આવી પહોંચી હતી અને પા ઇંચ પાણી પીરસી દીધુ હતુ.જ્યારે જેસર અને પાલિતાણામાં પણ સાંજના સુમારે ઝાપટા પડયા હતા
  મંગળવારે રાત્રિ સુધીમાં  ગારિયાધારમાં ૬૧, ભાવનગર શહેરમાં ૮, ઘોઘામાં ૮,જેસરમાં ૫,પાલિતાણામાં ૪ મિ.મી. વરસાદ પડ્યાનું સરકારી ચોપડે નોંધાયું હતુ.