સિવિલ હોસ્પિટલમા ગઈકાલે આગ કેમ બુઝાવી તેની કલાસ–૪ના કર્મચારીઓને તાલીમ આપવામાં આવી હતી જયારે આજે સવારે ઓપીડી બિલ્ડિંગના સાયકિયાટ્રીક ઓપીડીમાં એસી–કમ્પ્રેસરમાં આગ લાગતા ફાયર અને કલાસ–૪ના કર્મચારીઓએ મિનિટોમાં આગને બુઝાવી ગઈકાલની તાલીમને ખરા અર્થમાં સાર્થક કરી હતી.
અવાર નવાર આગ લાગવાના નાના–મોટા બનાવ બનતા હોવાથી આગ લાગે ત્યારે કેવી રીતે કાબુમાં લઈ શકાય એ માટે હોસ્પિટલ, સોસાયટી સહિતના કોર્મશિયલ બિલ્ડિંગમાં ફાયર વિભાગ દ્રારા ડેમો યોજી કર્મચારીઓ અને લોકોને તાલીમ આપવામાં આવે છે. ગઈકાલે રાજકોટ પીડીયુ સિવિલ હોસ્પિટલમાં ગાંધીનગરથી આવેલી ટિમની હાજરીમાં આગ લાગે ત્યારે ફાયર સિલિન્ડરનો ઉપયોગ કરી કેવી રીતે આગને બુઝાવી શકાય એ અંગે હોસ્પિટલના કલાસ–૪ કર્મચારીઓને લાઈવ ડેમો બતાવી તાલીમ આપવામાં આવી હતી. હજુ તાલીમ આપ્યાને ૨૪ કલાક જેટલો સમય થયો નહતો એ પહેલા જ આગની ઘટના બની હતી. આજે સવારે ઓપીડી બિલ્ડિંગમાં આવેલા બીજા લોર પર ૨૫ નંબરના સાયકિયાટ્રીક વોર્ડમાં એસી અને બહારના ભાગે આવેલા કમ્પ્રેસરમાં શોર્ટ સર્કિટ થવાથી અચાનક આગ લાગતા અફરા તફરીનો માહોલ સર્જાયો હતો. બનાવની પગલે ફાયર બિગ્રેડને જાણ કરાઈ હતી. જો કે ગઈકાલે કર્મચારીઓને આપવામાં આવેલી ફાયરની તાલીમ ખરા સમયે કામે લાગી હતી અને ફરજ પરના કર્મચારીઓએ ફાયર સિલિન્ડરથી તાકીદે આગ બુઝાવી હતી. આ દરમિયાન મિનિટોમાં જ ફાયર બિગ્રેડની ટિમ આવી જતા બહાર કમ્પ્રેશનના ભાગે પાણીનો મારો ચલાવી આગ બુઝાવી હતી. ઈલેકટ્રીશિયન પણ તાકીદે આવી હતા સ્વિચ બોર્ડ સહિતમાં આગ ફેલાઈ એ પહેલા વીજ સપ્લાય બધં કરી દેવામાં આવી હતી. સદનસીબે સવારનો સમય હોવાથી કોઈ જાન હાનિ થઇ નહતી