હરિયાણામાં મોટી દુર્ઘટના સામે આવી છે. જેમાં પંચકુલા જિલ્લામાં આવેલા જાસપુરમાં ઈંટના ભઠ્ઠાની દિવાલ ધરાશાયી થઈ છે. સમગ્ર ઘટના અનુસાર, આજે એટલે કે બુધવારે ઈંટના ભઠ્ઠામાં દિવાલ ધરાશાયી થઈ હતી. આ અકસ્માતમાં ત્રણ બાળકોના મોત થયા હતા, જ્યારે એક બાળક ઈજાગ્રસ્ત થયો હતો. આ અકસ્માત રાયપુર રાની વિસ્તારના જસપુર ગામમાં થયો હતો.

આ અંગે માહિતી મળ્યા બાદ પોલીસ ઘટનાસ્થળે પહોંચી ગઈ હતી અને બાળકોના મૃતદેહને પોતાના કબજામાં લીધા હતા. હાલ પોલીસ બાળકોના પરિવારજનો અને ઈંટના ભઠ્ઠાના માલિકની પૂછપરછ કરી રહી છે. પોલીસની પ્રાથમિક તપાસમાં મળેલી માહિતી મુજબ, ઉત્તર પ્રદેશના અલીગઢ જિલ્લાના પટવારી નાગલા ગામનો રહેવાસી પરિવાર 15 વર્ષથી કમલા ઈંટના ભઠ્ઠામાં કામ કરે છે.

બુધવારે સવારે 11 કલાકની આસપાસ મજૂર પરિવાર ઈંટ બનાવવાનું કામ કરી રહ્યો હતો. તેના બાળકો નજીકમાં રમતા હતા. અચાનક દિવાલ ધરાશાયી થઈ અને 4 બાળકો નીચે દટાઈ ગયા હતા. આ પછી પરિવારજનોએ તરત જ ચારેય બાળકોને બહાર કાઢ્યા અને નજીકની હોસ્પિટલમાં લઈ ગયા. ત્યાં ડોક્ટરોએ બે બાળકોને મૃત જાહેર કર્યા હતા, જ્યારે એક બાળકનું સારવાર દરમિયાન મોત થયું હતું. મૃતકોની ઓળખ રાફિયા (ઉ.વ.6), મોહમ્મદ સાદ (ઉ.વ.5), જીશાન (ઉ.વ.2) તરીકે થઈ છે. ઇજાગ્રસ્ત બાળક સિવિલ હોસ્પિટલમાં સારવાર હેઠળ છે.