મધ્ય પ્રદેશના ઉજ્જૈન સ્થિત મહાકાલ મંદિરમાં શુક્રવારે સાંજે ભારે વરસાદ વચ્ચે દુર્ઘટના થઈ હતી. મંદિરની એક દીવાલ ધરાશાયી થઈ હતી. દિવાલ ધરાશાયી થવાને કારણે કેટલાક લોકો કાટમાળ નીચે દટાયા હતા. આ અકસ્માતમાં 2 લોકોના મોત થયા છે.

મધ્યપ્રદેશના ઉજ્જૈનમાં ભારે વરસાદ ચાલુ છે અને આ વરસાદ વચ્ચે પ્રસિદ્ધ મહાકાલ મંદિરના ગેટ નંબર 4 ની એક દીવાલ ધરાશાયી થઈ ગઈ. જેના કારણે ઘણા લોકો તે દિવાલના કાટમાળ નીચે દટાઈ ગયા હતા. આ સ્થિતિમાં લોકોને બહાર કાઢવાની કામગીરી ચાલી રહી છે. મળતી માહિતી મુજબ આ અકસ્માતમાં બે લોકોના મોત થયા છે, અને બે લોકો ઘાયલ થયાની પુષ્ટિ થઈ છે. પ્રશાસને મૃતકોની વિગતો પણ જાહેર કરી છે.

ન્યૂઝ એજન્સી પીટીઆઈએ મહાકાલ મંદિરમાં થયેલી દુર્ઘટનાનો વીડિયો પણ જાહેર કર્યો છે, જેમાં ભારે વરસાદ વચ્ચે લોકો રાહત કાર્યમાં લાગેલા જોવા મળે છે. પીટીઆઈએ આ અકસ્માતમાં બે લોકોના મોતની પુષ્ટિ કરી છે અને અન્ય બે ઘાયલોને સારવાર માટે હોસ્પિટલમાં લઈ જવામાં આવ્યા છે.