પોરબંદરના હાઇવે પર રાત્રિના સમયે સર્જાતા વાહન અકસ્માત અટકાવવા માટે ટ્રાફિક શાખા દ્વારા રિફ્લેક્ટર્સ લગાવવાની કામગીરી હાથ ધરવામાં આવી હતી
અકસ્માત નિવારવાના ભાગ‚પે વાહનચાલકોને વાહનોમાં રિફલેકટર્સના મહત્વ અંગે સમજ આપવામાં આવી હતી તેમજ માલવાહક વાહનોમાં ક્ષમતા પ્રમાણે્ નિયમાનુસાર માલસામાન ભરવા ટ્રાફિક પી.એસ.આઈ.કે.બી.ચૌહાણ તથા તેમની ટીમ દ્વારા સમજ કરવામાં આવેલ હતી.એટલુ જ નહી પરંતુ રાત્રિના સમયે વાહનો રોડ પર પાર્ક કરવાથી અકસ્માતના બનાવ બને છે અને તેમાં અનેક નિર્દોષ લોકો મોતને ભેટી ચુક્યા છે.
તેથી છકડો રીક્ષા સહિતના વાહનોમાં પાછળના ભાગે રિફ્લેક્ટર્સ લગાવવાની કામગીરી પણ જિલ્લા હાઈવે ટ્રાફિક શાખા દ્વારા હાથ ધરવામાં આવી હતી. પી.એસ.આઇ. કે.બી.ચૌહાણ દ્વારા વાહનચાલકોને એવું જણાવ્યું હતું કે,હાઇવે ઉપર વાહનો ટ્રાફિકને અડચણરૂપ રાખવાને બદલે સાઈડમાં પાર્ક કરવા જોઈએ.જો કોઈ મોટા વાહનમાં પંચર પડ્યું હોય અને તેનું ટાયર બદલાવાની કામગીરી થતી હોય તો એવા સમયે આ વાહનની ૧૫ ફુટ આગળ અને પાછળ આડશ રાખવી દેવી જોઈએ અને રિફ્લેક્ટર્સવાળું વાહન રાખવું જોઈએ.જેથી રાત્રીના સમયે ગમખ્વાર અકસ્માતો સર્જાય છે તેને અટકાવી શકાશે વાહનચાલકોમાં આ મુદ્દે જનજાગૃતિ ફેલાવવામાં આવી હતી અને લોકોએ પણ પોલીસની આ કામગીરીને બિરદાવી હતી.