તિરુપતિ લાડુ વિવાદની ભક્તો પર કોઈ જ અસર નહી, ચાર દિવસમાં 14 લાખ લાડુનું વેચાણ 

વિશ્વ પ્રસિદ્ધ તિરુપતિ બાલાજી મંદિરના લાડુ વિવાદને લઈને આંધ્રપ્રદેશ સહિત સમગ્ર દેશમાં રાજકીય ગરમાવો છે. દક્ષિણ ભારતીય ફિલ્મોના બે દિગ્ગજ કલાકારો પ્રકાશ રાજ અને અભિનેતામાંથી રાજકારણી બનેલા પવન કલ્યાણ પણ આ મુદ્દે સામસામે આવી ગયા છે. મામલો સુપ્રીમ કોર્ટમાં પહોંચ્યો છે.

તિરુમાલા તિરુપતિ દેવસ્થાનમના ભૂતપૂર્વ ચેરમેન વાયવી સુબ્બા રેડ્ડીએ પણ સ્વતંત્ર સમિતિ દ્વારા તપાસની માંગ કરી હતી. પરંતુ આ વિવાદની શ્રદ્ધાળુઓ પર બહુ અસર થાય નથી. તેમનું કહેવું છે કે લાડુનો વિવાદ હવે ભૂતકાળ બની ગયો છે. તિરુપતિ મંદિરમાં લાડુનું વેચાણ પહેલાની જેમ જ ચાલુ છે. મંદિરમાં દરરોજ સરેરાશ 3.50 લાખ લાડુ વેચાય છે. ચાર દિવસમાં 14 લાખથી વધુ લાડુનું વેચાણ થયું છે.

  કેટલા લાડુ વેચાયા?

19 સપ્ટેમ્બર 3.59 લાખ
20 સપ્ટેમ્બર 3.17 લાખ
21 સપ્ટેમ્બર 3.67 લાખ
22 સપ્ટેમ્બર 3.60 લાખ

તિરુપતિ પ્રસાદ શા માટે ખાસ છે?

આંધ્રપ્રદેશ સ્થિત વિશ્વ પ્રસિદ્ધ તિરુપતિ બાલાજી મંદિરમાં દરરોજ હજારો ભક્તો દેશ અને દુનિયામાંથી ભગવાન વેંકટેશના દર્શન કરવા આવે છે. અહીંના પ્રસાદમનું પોતાનું ધાર્મિક મહત્વ છે. ભક્તો અવારનવાર અહીંથી પ્રસાદ ખરીદે છે અને પોતાની સાથે લઈ જાય છે. બદામ, કિસમિસ, કાજુ, બંગાળી ચણા, ખાંડ અને ગાયના ઘીમાંથી લાડુ તૈયાર કરવામાં આવે છે.

ચંદ્રબાબુ નાયડુએ આક્ષેપ કર્યો હતો
આંધ્રપ્રદેશના મુખ્યમંત્રી ચંદ્રબાબુ નાયડુએ આરોપ લગાવ્યો હતો કે તિરુપતિ બાલાજી મંદિરના લાડુના ઘીમાં પ્રાણીઓની ચરબી હોય છે. તેમણે અગાઉની YSRCP સરકાર પર પણ નિશાન સાધ્યું હતું. રાજ્ય સરકારે મામલાની તપાસ કરાવી અને કહ્યું કે લેબ રિપોર્ટમાં પણ તેની પુષ્ટિ થઈ છે.