શહેરના લાતી પ્લોટ રોડ ઉપર લાકડાના ગોડાઉનની દીવાલ ધરાશાયી થતા વાહનમાં જઈ રહેલા ત્રણ વ્યકિત દબાતા ઇજા થવાથી સારવારમાં ખસેડવામાં આવ્યા છે. જયારે વાહનોનો કચ્ચરઘાણ નીકળતા નુકશાન થયું હતું. બનાવના પગલે લોકોના ટોળા એકઠા થયા હતા અને પોલીસને જાણ કરવામાં આવતા પોલીસ અને ફાયરની ટિમ પણ દોડી ગઈ હતી.
પ્રા વિગત મુજબ આજે સવારે લાતી પ્લોટ રોડ ઉપરના ગોડાઉનની દીવાલ ધડાકાભેર તૂટી પડતા ત્યાંથી પસાર થતી બાઈક અને છોટા હાથી ઉપર પડતા બાઇકમાં સવાર વસંતભાઈ આત્મારામભાઈ ઠક્કર (ઉ.વ.૫૫–રહેમોરબી રોડ સત્યમ પાર્ક શેરી ન.ં ૩) અને છોટાહાથીમાં સવાર જયરાજ મહેશભાઈ ચૌહાણ (ઉ.વ.૨૨–રહે–લાતી પ્લોટ શેરી નં.૧૦) અને એઝાઝ ભીખુભાઈ આરવ (ઉ.વ.૨૩–રહે– ભગવતિ મોર્ડન સ્કૂલ પાસે) ત્રણેય દટાયા હતા. બનાવના પગલે આસપાસના વેપારીઓ સહિતના લોકો દોડી ગયા હતા અને ૧૦૮ને ફોન કરી ઇજાગ્રસ્તોને સારવાર માટે સિવિલ ખસેડવામાં આવ્યા હતા. જેમાં વસંતભાઈને વધુ ઇજા હોવાનું જાણવા મળ્યું છે. દીવાલ પડવાથી બે બગી, બાઈક, આઇસર અને છોટાહાથીનો કચ્ચરઘાણ થતા નુકશાન થયું હતું. બનાવના પગલે પોલીસે દોડી ગઈ હતી અને જરી કાર્યવાહી કરી હતી. થોડીવાર માટે વિસ્તારમાં નાસભાગ મચી જવા પામી હતી