ભારત અને ઓસ્ટ્રેલિયાએ ગઈકાલે તેમના દ્વિપક્ષીય સંરક્ષણ સહયોગ અને લશ્કરી આંતર-કાર્યક્ષમતાને વધુ ગાઢ બનાવવાનું વચન આપ્યું. બંને દેશોએ ત્રણ મુખ્ય કરારો પર હસ્તાક્ષર કર્યા અને ક્વાડ દેશો વચ્ચે વ્યૂહાત્મક સમન્વયમાં વિશ્વાસ વ્યક્ત કર્યો. આ બેઠક એવા સમયે થઈ રહી છે જ્યારે ટ્રમ્પ વહીવટીતંત્ર સંકેત આપી રહ્યું છે કે અમેરિકા હવે ચીનનો સામનો કરવા માટે ઈન્ડો-પેસિફિક વ્યૂહરચનામાં એટલું મોટું રોકાણ કરશે નહીં.

કેનબેરામાં પ્રતિનિધિમંડળ-સ્તરની બેઠક દરમિયાન, રક્ષા મંત્રી રાજનાથ સિંહ અને તેમના ઓસ્ટ્રેલિયન સમકક્ષ, રિચાર્ડ માર્લ્સે ગોપનીય સૂચનાઓનું આદાનપ્રદાન, પરસ્પર સબમરીન શોધ અને બચાવ સહયોગ તેમજ સંયુક્ત સ્ટાફ સંવાદ પદ્ધતિની સ્થાપના સંબંધિત ત્રણ મુખ્ય કરારો પર હસ્તાક્ષર કર્યા. બંને દેશો હવે સંયુક્ત દરિયાઈ સુરક્ષા સહયોગ રોડમેપ અને 2009ના સુરક્ષા કરારને બદલશે તેવા લાંબા ગાળાના સંરક્ષણ માળખાને અંતિમ સ્વરૂપ આપવા માટે કામ કરી રહ્યા છે.

અમેરિકા સાથે વધતા ટેરિફ વિવાદો અને રાજદ્વારી તણાવ વચ્ચે ભારત ઓસ્ટ્રેલિયા, જાપાન, દક્ષિણ કોરિયા અને ફિલિપાઇન્સ જેવા પ્રાદેશિક ભાગીદારો સાથે સંરક્ષણ સહયોગને વેગ આપી રહ્યું છે, જે બધા ઈન્ડો-પેસિફિક ક્ષેત્રમાં ચીનના વિસ્તરણવાદી વલણથી ચિંતિત છે.

રક્ષા મંત્રી રાજનાથ સિંહની ઓસ્ટ્રેલિયાની મુલાકાત 2014 પછી કોઈ ભારતીય રક્ષા મંત્રીની પહેલી સત્તાવાર મુલાકાત છે. આ પહેલા, પ્રધાનમંત્રી મોદીએ 29 ઓગસ્ટના રોજ જાપાન સાથે સુરક્ષા સહયોગ પર સંયુક્ત ઘોષણાપત્ર પર હસ્તાક્ષર પણ કર્યા હતા.

માર્લ્સે જણાવ્યું હતું કે ચીન બંને દેશો માટે સૌથી મોટી સુરક્ષા ચિંતાનો વિષય છે. બંને મંત્રીઓ સંમત થયા હતા કે મુક્ત, ખુલ્લા, સ્થિર અને સમૃદ્ધ ઈન્ડો-પેસિફિક જાળવવા માટે પ્રાદેશિક સહયોગને મજબૂત બનાવવો જરૂરી છે. તેઓએ દરિયાઈ નેવિગેશનની સ્વતંત્રતા, ઓવરફ્લાઇટ સલામતી અને અવરોધ વિનાના વેપારને ટેકો આપ્યો હતો. તેમણે ક્વાડ દેશો વચ્ચે દરિયાઈ દેખરેખ વધારવા અને આવતા મહિને થનારા માલાબાર નૌકાદળ કવાયતની તૈયારીઓ અંગે પણ ચર્ચા કરી હતી.

રાજનાથ સિંહે ટ્વીટ કરી જણાવ્યું કે, અમે ભારત-ઓસ્ટ્રેલિયા ભાગીદારીના સંપૂર્ણ માળખાની સમીક્ષા કરી, જેમાં સંરક્ષણ ઉદ્યોગ, સાયબર સુરક્ષા, દરિયાઈ સહયોગ અને પ્રાદેશિક પડકારોનો સમાવેશ થાય છે. અમે અમારી વ્યાપક વ્યૂહાત્મક ભાગીદારીનો પુનરોચ્ચાર કર્યો. ભારત વિશ્વને તેના તમામ સ્વરૂપોમાં આતંકવાદ સામે એક થવાનું આહ્વાન કરે છે.

તેમણે એમ પણ કહ્યું કે, આતંકવાદ અને સંવાદ સાથે રહી શકતા નથી, આતંકવાદ અને વેપાર સાથે રહી શકતા નથી તેમજ પાણી અને લોહી એકસાથે વહી શકતા નથી.

2020માં હસ્તાક્ષર કરાયેલા લશ્કરી લોજિસ્ટિક્સ કોઓપરેશન એગ્રીમેન્ટ બાદ બંને દેશોએ હવે તેમના વાયુસેના વચ્ચે હવા-થી-હવા રિફ્યુઅલિંગ કરાર પણ અમલમાં મૂક્યો છે. રાજનાથ સિંહને કેસી-30એ મલ્ટી-રોલ ટ્રાન્સપોર્ટ અને ટેન્કર એરક્રાફ્ટમાંથી એફ-35 ફાઇટર એરક્રાફ્ટના મધ્ય-હવા રિફ્યુઅલિંગનું પ્રદર્શન બતાવવામાં આવ્યું હતું.