પોરબંદરના ઉદ્યોગનગરમાં આવેલ રેલ્વે ફાટક પર હાલ ચોમાસા દરમિયાન તંત્રએ વરસાદી પાણીના નિકાલ માટેનું નાળુ બનાવવાની કામગીરી શ‚ કરતા હજારો લોકોને મુશ્કેલીનો સામનો કરવો પડી રહ્યો છે તેથી વહેલીતકે કામગીરી પુર્ણ કરવામાં આવે તેવી રજુઆત થઇ છે.
પોરબંદર હેલ્થ એજ્યુકેશન એન્ડ ચેરીટેબલ ટ્રસ્ટ અને ઇન્ડીયન રેડક્રોસ સોસાયટી પોરબંદર તાલુકા શાખાના ચેરમેન રામદેવભાઈ મોઢવાડિયાએ તંત્રને કરેલી રજુઆતમાં જણાવ્યું છે કે,પોરબંદર શહેરના ઉદ્યોગનગર રેલ્વે ફાટક પર વરસાદી પાણીના નિકાલ માટે નાળુ બનાવવાની કામગીરી શ‚ કરી છે જેના કારણે લોકોને અવરજવરમાં પારાવાર પરેશાનીનો સામનો કરવો પડે છે,વાસ્તવમાં આવી કામગીરી ચોમાસા પહેલા પ્રિ-મોન્સુન કામગીરીના ભાગરૂપે કરવાની હોય છે પરંતુ આગ લાગે ત્યારે જ કુવો ખોદવામાં માનતું પોરબંદરનું બેદરકાર તંત્ર અત્યારે પાણીના નિકાલ માટેનું નાળુ બનાવતું હોવાથી ઉદ્યોગનગર અને રોકડીયા હનુમાન મંદિર વિસ્તારની સોસાયટીના હજારો લોકોને ખુબ મોટી નુકસાની વેઠવી પડી રહી છે.
રેલ્વે ફાટક બંધ થતા વાહનચાલકોને ઓવરબ્રીજ પરથી પસાર થઈને રોંગસાઈડમાં જવાની ફરજ પડે છે,એટલું જ નહી પરંતુ ઉદ્યોગનગરમાં કામ કરવા જતા શ્રમિકોથી માંડીને કારખાનેદારોને પણ બે કિમીના આ ઓવરબ્રીજને ઓળગીને પસાર થવું પડે છે,આ વિસ્તારમાં અનેક સ્કુલો સહિત હોસ્પિટલો આવેલી છે,ત્યાં જતા વિદ્યાર્થીઓથી માંડીને દર્દીઓને પણ હેરાનગતિ ભોગવવી પડે છે.
રામદેવભાઈ મોઢવાડિયાએ વધુમાં જણાવ્યું છે કે,લોકોની મુશ્કેલીનો વહેલીતકે અંત આવે તે માટે તંત્રએ નાળુ બનાવવાની કામગીરીને વહેલીતકે પુર્ણ કરવી જોઈએ કારણકે તોડી નખાયેલા રોડમાંથી પસાર થતા પાણીના પ્રવાહમાંથી લોકો જીવના જોખમે પસાર થાય છે.હજુ ચોમાસું પુર્ણ થવાને વાર છે વધુ વરસાદ વરસે તેવી શક્યતાઓ જણાઈ રહી છે ત્યારે કોઈ જાનહાની થાય તે પહેલા તંત્રએ નાળુ બનાવવાની કામગીરીને પુરી કરાવવી જોઈએ તેવી માંગણી પોરબંદર હેલ્થ એજ્યુકેશન એન્ડ ચેરીટેબલ ટ્રસ્ટ અને ઇન્ડીયન રેડક્રોસ સોસાયટી પોરબંદર તાલુકા શાખાના ચેરમેન રામદેવભાઈ મોઢવાડિયાએ કરી છે.