બાંગ્લાદેશમાં વિદ્યાર્થી આંદોલન અને બળવા પછી, બાંગ્લાદેશ ક્રિકેટ બોર્ડ (BCB) માં પરિવર્તનનો ગણગણાટ શરૂ થયો છે. બાંગ્લાદેશ ક્રિકેટ બોર્ડના પ્રમુખ નઝમુલ હસન રાજીનામું આપે તેવી શક્યતા વધી ગઈ છે, કારણકે બોર્ડના અધિકારીઓએ 15 ઓગસ્ટે કહ્યું હતું કે તેઓ બોર્ડમાં સુધારા માટે સરકાર સાથે કામ કરવા તૈયાર છે.

નઝમુલ હસન બીસીબીના અધ્યક્ષ તરીકે ચોથા કાર્યકાળમાં છે. હસન હાલમાં જ તેની પત્ની સાથે લંડન ગયા છે. દેશમાં ચાલી રહેલા વિદ્યાર્થીઓના વિરોધ અને રાજકીય સંકટ વચ્ચે તેઓ સલામત સ્થળે ગયા છે. ભૂતપૂર્વ વડા પ્રધાન શેખ હસીના સાથેના સંબંધો ધરાવતા અન્ય કેટલાક મુખ્ય બોર્ડ ડિરેક્ટર પણ ત્યાં પહોંચ્યા છે.

14 ઓગસ્ટના રોજ ઢાકામાં યોજાયેલી મીટિંગમાં  BCBના કેટલાક ડિરેક્ટરોએ બોર્ડમાં સુધારાની દિશામાં આગળના પગલાં અંગે ચર્ચા કરી હતી. તેમણે નઝમુલ હસનની અધ્યક્ષતાવાળી સમિતિના રાજીનામાની માંગ કરી હતી. BCBના એક ડિરેક્ટરે કહ્યું- "અમારા એક ડિરેક્ટરે નઝમુલ હસનનો સંપર્ક કર્યો છે. તેણે કહ્યું કે તે સરકારને સહકાર આપવા અને જરૂર પડ્યે પદ છોડવા માટે તૈયાર છે."

બીજા ડિરેક્ટરે પણ આ વાતની પુષ્ટિ કરી અને કહ્યું કે જો બોર્ડ ચૂંટાયેલી સંસ્થા હેઠળ ચલાવવામાં આવે તો તેમને વચગાળાની સરકારના સંપૂર્ણ સહકારની જરૂર પડશે. રમત સલાહકાર આસિફ મહમૂદ BCB અધિકારીઓને મળ્યા હતા કે શું બોર્ડ ICC નિયમો હેઠળ વચગાળાના વડાની નિમણૂક કરી શકે છે. વર્તમાન બોર્ડનો કાર્યકાળ ઓક્ટોબર 2025 સુધીનો હોવાથી  ડિરેક્ટરોને ચિંતા છે કે રાજીનામાની અસર આ વર્ષે ઓક્ટોબરમાં બાંગ્લાદેશમાં યોજાનાર મહિલા T20 વર્લ્ડ કપ પર પડી શકે છે.

હાલમાં બોર્ડની કામગીરીને લઈને અનેક સવાલો ઉભા થઈ રહ્યા છે, જેમાં વચગાળાના બોર્ડની શક્યતા અને આઈસીસી દ્વારા સંભવિત કાર્યવાહીનો સમાવેશ થાય છે. ડિરેક્ટરે કહ્યું કે બંધારણમાં વચગાળાના બોર્ડની જોગવાઈ નથી, પરંતુ વચગાળાની ચૂંટણીની જોગવાઈ છે.