સારવારમાં ખસેડાયો : પોલીસ દ્વારા દારુના ખોટા કેસ કરી હેરાનગતીનો આક્ષેપ

જામનગરના લાખાબાવળમાં રહેતા એક યુવાને ગઇકાલે ઝેરી દવા પી લઇ આત્મહત્યાનો પ્રયાસ કરતાં તેને જી.જી હોસ્પિટલમાં દાખલ કરાયો છે. પોલીસના કથીત ત્રાસના કારણે પોતે દવા પી લીધી હોવાનો આક્ષેપ કરાયો છે. આ અંગેની વિગતો બહાર આવતા પોલીસ ટુકડીમાં દોડધામ મચી હતી.
જામનગર તાલુકાના લાખાબાવળ ગામમાં રહેતા જયરાજસિંહ બાબભા જાડેજા નામના યુવકે ગઇ સાંજે સરમતના પાટીયા પાસે પાનની દુકાને ઝેરી દવા પી લેતાં તેને સારવાર માટે હોસ્પિટલ ખસેડવામાં આવ્યો હતો, જ્યાં તેનું પ્રાથમિક નિવેદન લેવામાં આવતાં તેણે પોલીસના ત્રાસના કારણે ઝેરી દવા પીધી હોવાનો આક્ષેપ કરાયો હતો.
ત્રણ પોલીસ કર્મચારીઓ કે જેઓ દારુનો ખોટો કેસ કરવા માટે પૈસા માંગતા હતા, અને અગાઉ રુપિયા પડાવી લીધા હોવાનું અને હજુ વધુ રુપીયાની માંગણી કરતા હોવાથી પોતે ઝેરી દવા પી લીધી હોવાનો આક્ષેપ કરતો વિડીયો વાયરલ થયો હતો જે મામલે ઉચ્ચ પોલીસ અધિકારીઓ દ્વારા તપાસ કરવામાં આવી રહી છે. જે તપાસમાં વિગતો સ્પષ્ટ થશે હાલ આ બનાવે ચકચાર જગાવી છે.