હાલ રાજકોટમાં માવતરના ઘરે રહેતી પરિણીતાએ ધોરાજીના શાપર ગામે રહેતા પતિ વિરુદ્ધ યુનિવર્સિટી પોલીસ સ્ટેશનમાં ફરિયાદ નોંધાવી છે. જેમાં તેણે જણાવ્યું હતું કે,પતિને દારૂ પીવા જવાની ના કહેતા તેણે મારકુટ કરી છ માસના પુત્ર સાથે તેને ઘરમાંથી કાઢી મૂકી હતી.
બનાવની જાણવા મળતી વિગતો મુજબ, હાલ રાજકોટમાં માવતરના ઘરે રહેતી જાનવીબેન નામની પરિણીતાએ યુનિવર્સિટી પોલીસ સ્ટેશનમાં નોંધાવેલી ફરિયાદમાં આરોપી તરીકે મૂળ ધોરાજીના બહારપરા ખાટકીવાડ વિસ્તારમાં રહેતા અને હાલ અહીં શાપર ગામે રહેતા પતિ અતુલ ભુપતભાઈ સોંદરવાનું નામ આપ્યું છે. પરિણીતાએ ફરિયાદમાં જણાવ્યું હતું કે, તેના લગ્ન છ વર્ષ પૂર્વે અતુલ સોંદરવા સાથે થયા હતા લગ્નજીવન થકી સંતાનમાં બે વર્ષની દીકરી તુલસી અને છ માસનો પુત્ર ડેનિસ છે. પતિ છૂટક કડિયા કામ કરે છે. સાસુ-સસરા તથા દિયર અને જેઠ તેના ઘરના મકાનની સામે અલગ મકાનમાં રહે છે.
ગત તારીખ 16/10 ના રોજ રાત્રિના નવ વાગ્યા આસપાસ પતિના મિત્રો ઘરે આવી તેને દારૂ પીવા માટે લઈ જતા હોવાથી પરિણીતાએ પતિને જવાની ના પાડતા પતિ અતુલ ઉશ્કેરાઈ ગયો હતો અને પત્નીને માર મારવા લાગ્યો હતો. આ સમયે પતિના મિત્રોએ વચ્ચે પડી તેને વધુ મારમાંથી બચાવી હતી.બાદમાં પતિએ પત્નીને કહ્યું હતું કે ઘરેથી નીકળી જા. જેથી તેણે પોતાની માતાને ફોન કરી આ બાબતે જાણ કરતા તેઓ અહીં આવ્યા હતા બાદમાં તે દીકરી અને તેના સંતાનોને લઈને જતા હતા તે સમયે પતિએ દીકરીને સાથે લઈ જવાની ના કહી હતી અને પત્ની તથા છ માસના પુત્રને અહીંથી કાઢી મૂક્યા હતા.
પરિણીતાએ પોતાની ફરિયાદમાં વધુમાં જણાવ્યું હતું કે, પતિ છેલ્લા ત્રણ વર્ષથી અવારનવાર કોઈપણ બહાને ઝઘડો કરી ત્રાસ આપતો હોય જેથી આ અંગે અગાઉ શાપર પોલીસ સ્ટેશનમાં પતિ વિરુદ્ધ ચારેક વખત અરજી કરી હતી. પરંતુ બાદમાં સમાધાન થઈ ગયું હતું. પરંતુ હવે પતિનો ત્રાસ વધી ગયો હોય અંતે પરિણીતાએ પોલીસ ફરિયાદ નોંધાવી હતી. આ અંગે યુનિવર્સિટી પોલીસે ગુનો નોંધી જરૂરી કાર્યવાહી કરી છે.