જામનગર અને મુંગણીના બે શખ્સોની 'પાસા' હેઠળ અટકાયત

જામનગર માં આગામી લોકસભાની ચૂંટણીને અનુલક્ષીને નામચીન દારૂના ધંધાર્થીઓ તેમજ અન્ય માથાભારે શખ્સો સામે કડક પગલાં લેવાના ભાગરૂપે જિલ્લા પોલીસ તંત્ર દ્વારા દારૂના બે ધંધાર્થીઓની પાસા હેઠળ અટકાયત કર્યા પછી ગઈકાલે રાત્રે જામનગર અને મુંગણીના બે માથાભારે શખ્સો ની પણ પાસા હેઠળ અટકાયત કરી લઈ જેલહવાલે કરી દીધા છે.

જામનગરમાં સાધના કોલોની વિસ્તારમાં બ્લોક નંબર એમ -૮ રૂમ નંબર ૨૬૦૦ માં રહેતા હર્ષ ઉર્ફે ટકો પરેશભાઈ મહેતા નામના શખ્સ સામે તાજેતરમાં મારામારી સહિત ના અનેક ગુન્હાઓ નોંધાયા છે, જે માથાભારે શખ્સ સામે પાસા ની દરખાસ્ત તૈયાર કરી જિલ્લા પોલીસવડા મારફતે જિલ્લા કલેક્ટર સમક્ષ મોકલવામાં આવી હતી, જેને મંજૂરીને મહોર લાગી જતાં જિલ્લા પોલીસ વડા પ્રેમસુખ ડેલુ ના આદેશથી એલસીબીની ટુકડીએ હર્ષ ઉર્ફે ટકો પરેશભાઈ મહેતાની પાસા હેઠળ અટકાયત કરી લીધી છે, અને સુરતની લાજપોર જેલમાં મોકલી આપ્યો છે.

આ ઉપરાંત જામનગર તાલુકા ના મૂંગણી ગામમાં રહેતા સુરેન્દ્રસિંહ ઉર્ફે ઇલુ ભીખુભા કંચવા સામે પણ તાજેતરમાં મારામારી સંબંધે બે ગુના નોંધવામાં આવ્યા છે. જે માથાભારે શખ્સ સામેં પણ પાસા હેઠળની દરખાસ્ત તૈયાર કરાઈ હતી. જેને મંજૂરી મળી હોવાથી જિલ્લા પોલીસવડા પ્રેમસુખ ડેલુ ની ટુકડીએ સુરેન્દ્રસિંહ કંચવા ની અટકાયત કરી લીધી છે, અને વડોદરા ની મધ્યસ્થ જેલમાં મોકલી દેવાયો છે.