નીતિન ગડકરી સુધી ફરિયાદ થતા લેવાયું પગલું

ખંભાળિયાના દેવળીયાથી દ્વારકાના કુરંગા સુધીના ફોર લેન સીસી રોડને સરકાર દ્વારા ટોલ રોડ બનાવી, અને નેશનલ હાઈવે કરવા માટે રૂપિયા 1,200 કરોડનો ખર્ચ કર્યો છે. આ માર્ગ પર વાહન ચલાવવા આવતા-જતા કુલ 210 રૂપિયાનો ટોલ સ્વરૂપે ચાંદલો કરવો પડે છે.

ત્યારે આ નેશનલ હાઈવે બન્યાના થોડા સમયમાં ઠેર ઠેર ખાડા પડી ગયા જોવા મળે છે. દેવભૂમિ દ્વારકા જિલ્લામાં તાજેતરમાં વરસી ગયેલા ભારે વરસાદ વચ્ચે આ ખાડાઓનું કદ વધી જતા ખાસ કરીને વાહન ચાલકોને ભારે મુશ્કેલીનો સામનો કરવો પડે છે. સરકાર દ્વારા જુદા જુદા રસ્તા રીપેરીંગની કામગીરી કરવામાં આવી રહી છે, ત્યારે દેવળીયા - કુરંગા વચ્ચેનો આ ટોલ રોડ વ્યવસ્થિત રીતે ન થતા આ બાબત ચોથી જાગીર દ્વારા કેન્દ્રીય મંત્રી નીતિન ગડકરી સુધી પહોંચાડવામાં આવી હતી.

જિલ્લાના અધિકારીના ફોન ઉપાડવાની પણ દરકાર ન કરતા નેશનલ હાઈવે ઓથોરિટીને રેલો આવતા રાતોરાત તમામ પુલના ગાબડા પર રીપેરીંગ કામ કરી અને વાહન ચાલકોને થડકા ન આવે તેમજ ખાડાના રહે તે માટેની કામગીરી કરી નાખવામાં આવી હતી. જેથી વાહન ચાલકોને થોડી રાહત થઈ હતી.

યાત્રાધામ દ્વારકા તેમજ બેટ દ્વારકામાં દરરોજ જુદા જુદા વિસ્તારોમાંથી હજારોની સંખ્યામાં યાત્રિકો આવે છે. ત્યારે અહીંના રસ્તાઓ ખાડા ખડબાવાળા ન હોય એ બાબતની તકેદારી રાખવા માંગ કરાઈ છે.