જાણીને નવાઈ લાગશે કે વસ્તીની બાબતમાં ચીનને હંફાવી દેનારા ભારતને વધુ એક સિદ્ધી મળી છે, જો કે તેમાં ગર્વ લેવા જેવું કશું નથી, ઉલટું શીખ લેવી પડે એવું છે અને સ્થિતિ સુધારવી પડે તેવી ખતરાની ઘંટી છે, અને તે એ છે કે વિશ્વનું સૌથી પ્રદૂષિત શહેર બીજે ક્યાય નહી, ભારતમાં છે અને તે મેઘાલયનું બુર્નીહાટ છે. 2024 માં, બુર્નીહાટનું વાર્ષિક સરેરાશ પીએમ 2.5 સ્તર 128.2 માઇક્રોગ્રામ પ્રતિ ઘન મીટર હતું, જે હુની ભલામણ કરતા 25 ગણું વધારે છે. પીએમ એટલે કે પાર્ટીક્યુલેટ મોલેક્યુલ્સ 2.5 એ નાના કણો છે જે ફેફસાં સુધી પહોંચી શકે છે અને ગંભીર રોગોનું કારણ બની શકે છે.

ભારતના સૌથી પ્રદૂષિત શહેરોમાંના એક,બુર્નીહાટમાં રહેતી બે વર્ષની સુમાયા અંસારીને શ્વાસ લેવામાં તકલીફ હતી. તેમને હોસ્પિટલમાં દાખલ કરવામાં આવ્યા. ડોક્ટરોનું કહેવું છે કે શહેરની પ્રદૂષિત હવાને કારણે લોકો અનેક પ્રકારના રોગોનો ભોગ બની રહ્યા છે.સુમૈયાના પિતા અબ્દુલ હલીમે કહ્યું કે જ્યારે તેમની પુત્રીને શ્વાસ લેવામાં તકલીફ થતી હતી ત્યારે તેઓ ખૂબ જ ડરી ગયા હતા. સરકારી માહિતી અનુસાર, આ પ્રદેશમાં શ્વસન ચેપના કેસ 2022 માં 2082 થી વધીને 2024 માં 3681 થયા છે.

90% દર્દીઓને ખાંસી અથવા અન્ય શ્વાસની તકલીફ

સ્વિસ ગ્રુપ આઈકયુએરમાં પ્રદૂષિત શહેરોની યાદીમાં આ શહેર ટોચ પર છે. ડોક્ટરો કહે છે કે દરરોજ આવતા 90% દર્દીઓને ખાંસી અથવા અન્ય શ્વાસની તકલીફ હોય છે.સ્થાનિક રહેવાસીઓનું કહેવું છે કે ઝેરી હવાને કારણે ત્વચા પર ફોલ્લીઓ અને આંખોમાં બળતરા પણ થાય છે. પાકને નુકસાન થાય છે અને કપડાં સૂકવવાનું મુશ્કેલ બની જાય છે.બુર્નિહાટની પરિસ્થિતિ ભારતના અન્ય શહેરો જેવી છે, જ્યાં ઝડપી ઔદ્યોગિકીકરણને કારણે પર્યાવરણીય સંરક્ષણની અવગણના કરવામાં આવી રહી છે. બુર્નિહાટમાં હવાની ગુણવત્તા આખું વર્ષ નબળી રહે છે, જ્યારે અન્ય શહેરોમાં આ સમસ્યા ફક્ત શિયાળામાં જ જોવા મળે છે.

બુર્નિહાટમાં ૮૦ ઉદ્યોગોના લીધે હવા ઝેરી બની

શહેરમાં લગભગ ૮૦ ઉદ્યોગો છે, જેમાંથી ઘણા ખૂબ પ્રદૂષિત છે. નિષ્ણાતો કહે છે કે શહેરની "બેસિન જેવી ભૂગોળ" પ્રદૂષકોને વિસર્જન કરતા અટકાવે છે. આસામ અને મેઘાલય સરકારો હવે સંયુક્ત સમિતિની રચના કરીને પ્રદૂષણનો સામનો કરવા માટે સાથે મળીને કામ કરવા સંમત થઈ છે.