શહેરમાં લૂંટ, વાહન ચોરી અને મારામારીના છ જેટલા ગુનામાં જુદા જુદા પોલીસ મથકના ચોપડે ચડી ચુકેલો હિસ્ટ્રીશીટર રમીઝ ઉર્ફે બચ્ચો ઉર્ફે રાહીલ ઈમરણભાઇ જેસડિયા સામે માલવીયાનગર પોલીસે પાસ હેઠળની કાર્યવાહી કરી શખ્સને વડોદરા જેલમાં ધકેલ્યો છે.
રાજકોટ પોલીસ કમિશનર બ્રિજેશ કુમાર ઝા ની સૂચના મુજબ ગુનાહિત ઇતિહાસ ધરાવતા અને મિલકત સબંધી ગુનાઓ આચરતા શખ્સો સામે કડક કાર્યવાહી કરવા સૂચના આપતા માલવીયાનગર પોલીસ સ્ટેશનમાં વાહન ચોરીના ગુનામાં સંડોવાયેલો રમીઝ ઉર્ફે બચ્ચો ઉર્ફે રાહીલ ઈમરણભાઇ જેસડિયા (ઉ.વ.20-રહે-સાધુવાસવાણી રોડ, ગુરુજી નગર આવાસ ક્વાર્ટર)નો ગુનાહિત ઇતિહાસ ઈ-ગુજકોપમાં તપાસતા તેની સામે લૂંટ, વાહન ચોરી અને મારામારીના પ્ર.નગર, યુનિવર્સીટી, એ-ડિવિઝન, તાલુકા પોલીસમાં ગુના નોંધાયેલા છે. શખ્સ ગુનાહિત ઇતિહાસ ધરાવતો હોવાથી માલવીયા પીઆઇ જે.આર.દેસાઈના માર્ગદર્શન હેઠળ તેની સામે પાસાની દરખાસ્ત તૈયાર કરી પોલીસ કમિશનરને મોકલી આપતા દરખાસ્તને મંજૂર કરવામાં આવતા માલવીયા નગર પોલીસ મથકના પીએસઆઇ એસ.એ.સિંધી તેમજ ટીમના એએસઆઇ દીપકભાઈ રાઠોડ, હિરેનભાઈ પરમાર, પો.હેડ.કોન્સ મહેશભાઈ રૂદાતલા સહિતનાએ શખ્સને ઝડપી પાડી તેને વડોદરા જેલ હવાલે કરવાની તજવીજ હાથ ધરી હતી.

ખોડિયારનગરમાં રહેતા બુટલેગરને પાસા
પીસીબીના ઇન્ચાર્જ પીઆઇ એમ. આર. ગોંડલીયાએ ગોંડલ રોડ પર એસ.ટી વર્કશોપ પાછળ ખોડીયારનગરમાં રહેતા મુસ્તુફા ઈકબાલભાઇ લીંગડીયા(ઉ.વ 28) નામના શખસ સામે પાસાની દરખાસ્ત તૈયાર કરી પોલીસ કમિશનરને મોકલતા પોલીસ કમિશનરે દરખાસ્ત પર મંજૂરીની મોહર લગાવી આરોપી સામે પાસાનું વોરંટ ઇશ્યૂ કર્યું હતું. જેથી પીસીબીના સ્ટાફે વોરંટની બજવણી કરી આરોપીની પાસા હેઠળ અટકાયત કરી વડોદરા જેલહવાલે કરવા તજવીજ હાથ ધરી છે. આરોપી મુસ્તુફા લીંગડીયા સામે અગાઉ ડીસીબી અને માલવીયાનગર પોલીસ સ્ટેશનમાં દારૂ અંગેના ત્રણ ગુના નોંધાઈ ચૂક્યા હોવાનું જાણવા મળ્યું છે.