કેન્દ્ર સરકાર નાણાકીય વર્ષ 2024-25ના બીજા છમાસિક ગાળા દરમિયાન રૂ. 6.61 લાખ કરોડની લોન એકત્ર કરશે જેથી આવક અને ખર્ચ વચ્ચેના અંતરને દૂર કરી શકાય. નાણા મંત્રાલયે જણાવ્યું હતું કે, કેન્દ્ર સરકારે બેંકિંગ સેક્ટર રેગ્યુલેટર રિઝર્વ બેંક ઓફ ઈન્ડિયા સાથે મળીને ચાલુ નાણાકીય વર્ષના બીજા છમાસિક માટે ઋણ લેવાના કાર્યક્રમને અંતિમ સ્વરૂપ આપ્યું છે. નાણા મંત્રાલયે કહ્યું કે, નાણાકીય વર્ષ 2024-25માં સરકારે કુલ 14.01 લાખ કરોડ રૂપિયાની લોન એકત્ર કરવાનો લક્ષ્યાંક રાખ્યો છે, જેમાંથી 6.61 લાખ કરોડ રૂપિયા, જે એકત્ર થનારી કુલ લોનના 47.2 ટકા છે તેને ડેટેડ સિક્યોરિટીઝ દ્વારા નાણાંકિય વર્ષના બીજા છમાસિકમાં એકત્ર કરવામાં આવશે જેમાં 20,000 કરોડ રુપિયાનું સોવરીન ગ્રીમ બોન્ડ પણ સામેલ છે.
નાણા મંત્રાલયે કહ્યું કે, 21 સાપ્તાહિક હરાજી દ્વારા 6.61 લાખ કરોડ રૂપિયા એકત્ર કરવામાં આવશે. સરકાર આરબીઆઈ સાથે મળીને 3, 5, 7, 10, 15, 30, 40 અને 50 વર્ષની સિક્યોરિટીઝ જાહેર કરીને નાણાં એકત્ર કરશે. આ પૈકી ત્રણ વર્ષની પાકતી મુદતવાળી લોનનો ભાગ સૌથી ઓછો 5.3 ટકા હશે, જ્યારે 10 વર્ષની પાકતી મુદતવાળી સિક્યોરિટીઝનો ભાગ સૌથી વધુ 24.8 ટકા હશે. મંત્રાલયે જણાવ્યું હતું કે, હરાજીની સૂચનાઓમાં દશર્વિેલ દરેક સિક્યોરિટીઝ માટે રૂ. 2,000 કરોડનું વધારાનું સબસ્ક્રિપ્શન જાળવી રાખવા માટે ગ્રીનશૂ વિકલ્પ હશે.
સરકારે ચાલુ નાણાકીય વર્ષ દરમિયાન રૂ. 14.01 લાખ કરોડની લોન એકત્ર કરવાનો લક્ષ્યાંક રાખ્યો છે, જેની જાહેરાત સંપૂર્ણ બજેટ રજૂ કરતી વખતે કરવામાં આવી હતી. જ્યારે વચગાળાના બજેટમાં નાણાકીય વર્ષ દરમિયાન 14.13 લાખ કરોડ રૂપિયા એકત્ર કરવાનો લક્ષ્યાંક રાખવામાં આવ્યો હતો. નાણાકીય વર્ષ 2023-24માં સરકારે 15.43 લાખ કરોડ રૂપિયાની લોન એકત્ર કરી હતી.
 તેનો અર્થ એ છે કે, સરકાર ચાલુ નાણાકીય વર્ષમાં પાછલા નાણાકીય વર્ષ કરતાં 9 ટકા ઓછું કર્જ લઈ રહી છે. આનાથી રાજકોષીય ખોટ ઓછી રાખવામાં મદદ મળશે. સરકારે રાજકોષીય ખોટનો લક્ષ્યાંક 4.9 ટકા રાખ્યો છે, જે વચગાળાના બજેટના 5.1 ટકાના લક્ષ્ય કરતાં ઓછો છે. આમાં સૌથી મોટી મદદ આરબીઆઈ દ્વારા આપવામાં આવી હતી જેણે સરકારને 2.1 લાખ કરોડ રૂપિયાનું ડિવિડન્ડ આપ્યું છે.