તાલિબાન શાસિત અફઘાનિસ્તાનના વિદેશ મંત્રી અમીર ખાન મુત્તાકી, જેઓ ભારતની પહેલી મુલાકાતે છે, તેમણે રવિવારે કહ્યું કે અફઘાનિસ્તાન પાકિસ્તાન સાથેના તેના સંઘર્ષનો શાંતિપૂર્ણ ઉકેલ ઇચ્છે છે. જોકે, તેમણે પાકિસ્તાનને ખુલ્લી ચેતવણી આપતા કહ્યું કે, જો પ્રયાસો સફળ ન થાય, તો અમારી પાસે અન્ય વિકલ્પો છે. અફઘાન દૂતાવાસમાં એક પ્રેસ કોન્ફરન્સ દરમિયાન મુત્તાકીની ટિપ્પણીઓ અફઘાનિસ્તાન અને પાકિસ્તાન વચ્ચે વધતા તણાવ વચ્ચે આવી.

પાકિસ્તાને ગુરુવારે કાબુલમાં હવાઈ હુમલો કર્યો, જેના કારણે બંને પક્ષો વચ્ચે અથડામણ થઈ. તાલિબાને 58 પાકિસ્તાની સૈનિકો માર્યા ગયા હોવાનો દાવો કર્યો. મુત્તાકીએ કહ્યું કે પરિસ્થિતિ હવે નિયંત્રણમાં છે. અમે પરિસ્થિતિનો શાંતિપૂર્ણ ઉકેલ ઇચ્છીએ છીએ, પરંતુ જો શાંતિ પ્રયાસો સફળ ન થાય તો અમારી પાસે અન્ય વિકલ્પો છે. અમારા પાકિસ્તાનના લોકો અને સરકાર સાથે સારા સંબંધો છે, પરંતુ તે દેશના કેટલાક તત્વો સમસ્યાઓ ઊભી કરવાનો પ્રયાસ કરી રહ્યા છે.

દરમિયાન, સૂત્રોએ જણાવ્યું હતું કે, સરહદી વિસ્તારોમાં અફઘાન દળો દ્વારા "હુમલા"ના જવાબમાં પાકિસ્તાને 19 અફઘાન લશ્કરી ચોકીઓ કબજે કરી હતી. કાબુલે દાવો કર્યો હતો કે જવાબી હુમલામાં 58 પાકિસ્તાની સૈનિકો માર્યા ગયા હતા અને 30 અન્ય ઘાયલ થયા હતા. તાલિબાનના નેતૃત્વ હેઠળની સરકારના સંરક્ષણ મંત્રાલયે રવિવારે વહેલી સવારે હુમલાઓની પુષ્ટિ કરતા કહ્યું કે તેમના દળોએ જવાબી અને સફળ કાર્યવાહી કરી છે. મંત્રાલયે કહ્યું, જો દુશ્મન પક્ષ ફરીથી અફઘાનિસ્તાનની પ્રાદેશિક અખંડિતતાનું ઉલ્લંઘન કરશે તો અમારા સશસ્ત્ર દળો દેશની સરહદોનું રક્ષણ કરવા માટે સંપૂર્ણપણે તૈયાર છે અને જોરદાર જવાબ આપશે.

અફઘાન દળોએ ખૈબર પખ્તુનખ્વામાં અંગૂર અદ્દા, બાજૌર, કુર્રમ, દીર અને ચિત્રાલ અને બલુચિસ્તાનમાં બારામચામાં પાકિસ્તાની ચોકીઓને નિશાન બનાવી હતી. ટોલો ન્યૂઝે અહેવાલ આપ્યો છે કે તાલિબાન સરકારના મુખ્ય પ્રવક્તા ઝબીહુલ્લાહ મુજાહિદે જણાવ્યું હતું કે શનિવારે રાત્રિના ઓપરેશન દરમિયાન 58 પાકિસ્તાની સૈનિકો માર્યા ગયા હતા અને લગભગ 30 અન્ય ઘાયલ થયા હતા. મુજાહિદે વધુમાં જણાવ્યું હતું કે ડ્યુરન્ડ લાઇન પાર જવાબી હુમલા દરમિયાન, 20 પાકિસ્તાની સુરક્ષા ચોકીઓનો નાશ કરવામાં આવ્યો હતો અને અસંખ્ય શસ્ત્રો અને લશ્કરી સાધનો જપ્ત કરવામાં આવ્યા હતા.