પોલીસે સીસી ફુટેજ કબ્જે લીધા : યુવકના મૃતદેહને પીએમમાં ખસેડાયો : રહસ્યના આટાપાટા : સઘન તપાસ-પુછપરછ

જામનગરની ખોડીયાર કોલોનીમાં આવેલા રાધે રેસ્ટોરન્ટમાં વેઇટરનું શંકાસ્પદ મૃૃત્યુ થતા પોલીસ ટુકડી દોડી ગઇ હતી અને મૃતદેહને પીએમ માટે લઇ જવામાં આવ્યો છે, જયાં પીએમ શોર્ટનોટમાં કારણ સ્પષ્ટ થશે, હાલ રહસ્યના આટાપાટા સર્જતા આ બનાવે ભારે ચકચાર જગાવી છે અને સુત્રો દ્વારા હત્યાની આશંકા દર્શાવવામાં આવી છે.
જાણવા મળતી વિગત મુજબ મુળ ખેડા જીલ્લાના વતની વિનીતકુમાર પટેલ (ઉ.વ.૨૬) નામનો યુવાન ખોડીયાર કોલોની વિસ્તારમાં આવેલ રાધે રેસ્ટોરન્ટમાં વેઇટરનું કામ કરે છે દરમ્યાન રાત્રીના કોઇપણ સુમારે શંકાસ્પદ મોત થયુ હતું અને વહેલી સવારે આ અંગેન જાણ થતા સીટી-સી ડીવીઝન પોલીસનો કાફલો દોડી ગયો હતો અને પ્રાથમિક તપાસ હાથ ધરી હતી તથા યુવકના મૃતદેહને પીએમ માટે મોકલી આપ્યો હતો.
પોલીસે રેસ્ટોરન્ટ અને આજુબાજુના સીસીટીવ ચેક કર્યા હતા અને ફુટેજ મેળવ્યા હોવાની વિગતો મળી છે, ગળાના ભાગે નિશાન હોવાનું પ્રાથમિક દ્રષ્ટીએ જાણવા મળતા આ રહસ્યમય બનાવમાં હત્યાની આશંકા દશાર્ર્વવામાં આવી રહી છે, બીજી બાજુ પીએમ રીપોર્ટમાં વધુ વિગતો સ્પષ્ટ થશે, સીટી-સી પીઆઇ ચૌધરીના માગદર્શન હેઠળ પોલીસ ટુકડીઓ દ્વારા પુછપરછ અને ફુટેજનું નિરીક્ષણ કરવામાં આવી રહયું છે જે તપાસના અંતે આ શંકાસ્પદ મૃત્યુના બનાવ પરથી પડદો ઉંચકાશે હાલ બનાવના પગલે ભારે ચકચાર ફેલાઇ જવા પામી છે.