જામનગર મહાનગરપાલિકામાં કેટલાક સમયથી પોપાબાઇનું રાજ ચાલે છે, સવારે ૧૦.૩૦ ને બદલે ૧૧.૩૦ સુધી મોટાભાગની કચેરીઓમાં કામકાજ થતાં નથી, એટલું જ નહીં રીસેષ પછી લગભગ ૪.૧પ સુધી કર્મચારીઓ ટેબલ પર બેસતા ન હોવાની થોકબંધ ફરિયાદો મ્યુ. કમિશ્નર દિનેશ મોદીને મળી હતી, આજે તેઓએ ઓચિંતા ડીએમસી ભાવેશ જાનીને સાથે રાખીને મોટાભાગની બ્રાંચોનું ચેકીંગ કર્યું હતું, જેમાં કેટલાક કર્મચારીઓ ગેરહાજર હોવાનું બહાર આવ્યું છે અને તમામ સામે કડક પગલા લેવામાં આવશે તેમ મ્યુ. કમિશ્નરે આજકાલ સાથેની વાતચીતમાં જણાવ્યું છે, આજે વિવિધ વિભાગોના વડા સાથે વાતચીત કરીને લોકોની સમસ્યા તાત્કાલિક ઉકેલવા આદેશ આપ્યો હતો. આમ નવનિયુક્ત કમિશ્નરે આજે મહાપાલિકામાં કેટલાક વિભાગોમાં લટાર મારતા ગુટલીબાજ કર્મચારીઓમાં ફફડાટની લાગણી જન્મી છે.