આજે ભારતીય શેરબજારોમાં સતત ચોથા દિવસે ઘટાડો જોવા મળ્યો. ટ્રેડિંગ દરમિયાન સેન્સેક્સ 731 પોઈન્ટ ઘટીને ૮૪,૨૦૭ના સ્તરે ટ્રેડ થયો હતો. નિફ્ટી પણ ૨૫૬ પોઈન્ટ ડાઉન થઇ 25,884ના સ્તરે સરકી ગયો. વિદેશી રોકાણકારો દ્વારા સતત વેચવાલી અને વૈશ્વિક બજારોમાંથી નબળા સંકેતોને કારણે શેરબજારનું સેન્ટિમેન્ટ દબાણ હેઠળ રહ્યું. વધુમાં, ભારત-યુએસ વેપાર કરારને લગતી અનિશ્ચિતતાને કારણે રોકાણકારો સાવચેતીભર્યા દેખાયા.

બજારનાં દબાણનું સૌથી મોટું કારણ વિદેશી રોકાણકારો દ્વારા વેચાણ હતું. ગઈકાલે વિદેશી રોકાણકારોએ આશરે રૂ. ૧,૫૨૭.૭૧ કરોડના શેર વેચ્યા હતા. જાન્યુઆરીમાં અત્યાર સુધીમાં, વિદેશી રોકાણકારોએ ભારતીય શેરબજારમાં આશરે રૂ.૪,૬૫૦ કરોડનું વેચાણ કર્યું છે. આ મહિનામાં એક દિવસ સિવાય તમામ દિવસે વેચાણ કર્યું છે, જેના પરિણામે શેરબજાર પર દબાણ ચાલુ રહ્યું છે.

ભારતીય શેરબજારને પણ વૈશ્વિક શેરબજારો તરફથી કોઈ ટેકો મળ્યો નથી. એશિયન બજારોમાં નબળાઈ જોવા મળી. જાપાનનો નિક્કી ૨૨૫ અને હોંગકોંગનો હેંગ સેંગ ઇન્ડેક્સ રેડ ઝોનમાં ટ્રેડ થયો. ગઈકાલે યુએસ બજારો પણ નબળાઈ સાથે બંધ થયા. મોતીલાલ ઓસ્વાલ ફાઇનાન્શિયલ સર્વિસિસના વિશ્લેષક અભિષેક સરાફે રોઇટર્સને જણાવ્યું હતું કે ભૂરાજકીય અને વૈશ્વિક વેપાર અનિશ્ચિતતાઓ શેરબજારના સેન્ટિમેન્ટ પર ભાર મૂકી રહી છે.

ભારત-અમેરિકા વેપાર કરારની આસપાસની અનિશ્ચિતતા પણ બજાર પર ભાર મૂકી રહી છે. છેલ્લા ત્રણ દિવસમાં નિફ્ટી ૫૦ ઇન્ડેક્સ લગભગ ૦.૭ ટકા અને સેન્સેક્સ લગભગ ૦.૯ ટકા ઘટ્યો છે. આ ઘટાડો એવા સમયે થયો છે જ્યારે યુએસ પ્રમુખ ડોનાલ્ડ ટ્રમ્પે રશિયા પાસેથી તેલ ખરીદવા બદલ ભારત પર ટેરિફ વધારવાની ધમકી આપી છે. અમેરિકાએ પહેલાથી જ ઘણી ભારતીય ચીજવસ્તુઓ પર ૫૦ ટકા સુધી ટેરિફ લાદી દીધો છે, જેમાં ૨૫ ટકા ટેરિફ રશિયન ક્રૂડ ઓઇલની ખરીદી પર લાદવામાં આવ્યા છે. ટ્રમ્પના તાજેતરના નિવેદનોથી બંને દેશો વચ્ચેના વેપાર કરાર અંગે અનિશ્ચિતતા વધી છે.

જિયોજિત ઇન્વેસ્ટમેન્ટ્સ લિમિટેડના ચીફ ઇન્વેસ્ટમેન્ટ સ્ટ્રેટેજિસ્ટ વી.કે. વિજયકુમારના મતે, યુએસ-ભારત વેપાર કરાર ભારતની લાંબા ગાળાની વૃદ્ધિની સંભાવનાઓ અને મેક્રોઇકોનોમિક સ્થિરતા માટે મહત્વપૂર્ણ છે. તેમણે કહ્યું કે કરારમાં વિલંબ અને વિદેશી રોકાણકારો દ્વારા સતત વેચાણ બંને હાલમાં બજાર પર દબાણ લાવી રહ્યા છે.

ક્રૂડ ઓઇલના ભાવમાં થોડો વધારો થવાથી બજારની ચિંતાઓ પણ વધી. આંતરરાષ્ટ્રીય સ્તરે આજે બ્રેન્ટ ક્રૂડના ભાવ ૦.૪ ટકા વધીને પ્રતિ બેરલ ૬૦.૨૦ ડોલરની આસપાસ પહોંચી ગયા. ભારત તેની તેલની જરૂરિયાતોનો મોટો ભાગ આયાત કરે છે. તેથી, ક્રૂડ ઓઇલના વધતા ભાવ રોકાણકારોની ફુગાવા અને ચાલુ ખાતાની ખાધ અંગે ચિંતામાં વધારો કરે છે.