29 ડિસેમ્બર 2024 નો દિવસ દક્ષિણ કોરિયા માટે ખૂબ જ ભયાનક રહ્યો હતો. એ દિવસે, જેજુ એરલાઇન્સનું વિમાન મુઆન આંતરરાષ્ટ્રીય એરપોર્ટ પર અકસ્માતનો ભોગ બન્યું હતું.જેમાં વિમાનમાં સવાર 181 લોકોમાંથી બે વ્યક્તિ સિવાય અન્ય 179 લોકો મૃત્યુ પામ્યા હતા. હવે આ અકસ્માત અંગે એક મોટો ખુલાસો થયો છે. દક્ષિણ કોરિયાના પરિવહન મંત્રાલયે જણાવ્યું હતું કે અકસ્માતના ચાર મિનિટ પહેલા વિમાનના બ્લેક બોક્સે કામ કરવાનું બંધ કરી દીધું હતું. એનો અર્થ એ કે બ્લેક બોક્સમાંથી છેલ્લી ચાર મિનિટનું રેકોર્ડિંગ ગાયબ છે.

છેલ્લી 4 મિનિટનું રેકોર્ડિંગ ખૂટે છે

પરિવહન મંત્રાલયે જણાવ્યું હતું કે જેજુ એરલાઇન્સના બોઇંગ 737-800 વિમાનમાં કોકપીટ વોઇસ રેકોર્ડર (CVR) અને ફ્લાઇટ ડેટા રેકોર્ડર (FDR) એ વિમાન દુર્ઘટનાના ચાર મિનિટ પહેલા કામ કરવાનું બંધ કરી દીધું હતું પરંતુ આ ઉપકરણ કેમ બંધ કરવામાં આવ્યું તે તપાસનો વિષય છે. મંત્રાલયે વધુમાં જણાવ્યું હતું કે વિમાન દુર્ઘટનાઓની તપાસ માટે CVR અને FDR ડેટા મહત્વપૂર્ણ છે પરંતુ અકસ્માતની તપાસ વિવિધ ડેટાની તપાસ અને વિશ્લેષણ દ્વારા કરવામાં આવે છે, તેથી અમે અકસ્માતનું ચોક્કસ કારણ શોધવા માટે અમારા શ્રેષ્ઠ પ્રયાસો કરી રહ્યા છીએ.

અકસ્માતની તપાસમાં મહિનાઓ લાગી શકે 

દક્ષિણ કોરિયાના પરિવહન મંત્રાલયે વધુમાં જણાવ્યું હતું કે કોકપીટ વોઇસ રેકોર્ડરનું પહેલા સ્થાનિક સ્તરે વિશ્લેષણ કરવામાં આવ્યું હતું અને બાદમાં તેને ક્રોસ-ચેક માટે યુએસ મોકલવામાં આવ્યું હતું. ફ્લાઇટ ડેટા રેકોર્ડર સંપૂર્ણપણે ક્ષતિગ્રસ્ત થઈ ગયું હતું અને તેનું કનેક્ટર પણ ગાયબ હતું. FDR પણ વિશ્લેષણ માટે અમેરિકા મોકલવામાં આવ્યો છે. યુએસ નેશનલ ટ્રાન્સપોર્ટેશન સેફ્ટી બોર્ડ તેનું વિશ્લેષણ કરશે. મંત્રાલયે કહ્યું કે વિમાન દુર્ઘટનાનું કારણ શું હતું તે હજુ સુધી જાણી શકાયું નથી. તેની તપાસમાં મહિનાઓ લાગી શકે છે.

જેજુ વિમાન કેવી રીતે ક્રેશ થયું?

જેજુ એરલાઇન્સનું આ વિમાન 181 લોકોને લઈને બેંગકોકથી દક્ષિણ કોરિયા આવી રહ્યું હતું. મુઆન એરપોર્ટ પર ઉતરાણ કર્યા પછી, વિમાન થોડી સેકન્ડ માટે રનવે પર ચાલ્યું અને પછી તે રનવે પરથી લપસી ગયું અને એરપોર્ટની દિવાલ સાથે અથડાયું. એ પછી વિમાનમાં ભયંકર આગ લાગી ગઈ. આગ લાગતાની સાથે જ એરપોર્ટ પર અંધાધૂંધી મચી ગઈ. માહિતી મળતા જ ફાયર બ્રિગેડની ટીમ તાત્કાલિક પહોંચી ગઈ.