ખંભાળિયાના ઝવેરી બજાર વિસ્તારમાં આવેલા શ્રી શરણેશ્વર મહાદેવના મંદિર ખાતે સમૂહ શ્રીમદ ભાગવત સપ્તાહના કાર્યક્રમનો પ્રારંભ થયો છે. લાભ પાંચમના દિને તા. 6 થી બુધવાર તારીખ 13 નવેમ્બર સુધી કલ્યાણજી સત્સંગ મંડળ દ્વારા યોજાયેલી આ સમૂહ શ્રીમદ ભાગવત સપ્તાહ જ્ઞાનયજ્ઞમાં વ્યાસપીઠ પર જાણીતા કથાકાર શાસ્ત્રી શ્રી ચિરાગભાઈ શુક્લ બિરાજીને પોતાની આગવી શૈલીમાં કથામૃતનું રસપાન કરાવી રહ્યા છે.

આ પ્રસંગે આવતીકાલે શુક્રવારે સાંજે કપિલ પ્રાગટ્ય, શનિવારે સાંજે નૃસિંહ પ્રાગટ્ય, રવિવારે રામ જન્મ તેમજ કૃષ્ણ જન્મોત્સવ, સોમવારે ગોવર્ધન લીલા, મંગળવારે શ્રી કૃષ્ણ રૂક્ષ્મણી વિવાહ અને બુધવારે પરીક્ષિત મોક્ષ સહિતના વિવિધ ધર્મમય કાર્યક્રમો યોજવામાં આવ્યા છે. આ સમૂહ ભાગવત સપ્તાહમાં બપોરે 3 થી સાંજે 7 વાગ્યા સુધી કથા શ્રવણનો લાભ લેવા ધર્મ પ્રેમી જનતાને કલ્યાણજી સત્સંગ મંડળના આયોજકો દ્વારા અનુરોધ કરવામાં આવ્યો છે.