ભારતીય હવામાન વિભાગએ જણાવ્યું હતું કે ચોમાસાની સિઝનના બીજા ભાગમાં (ઓગસ્ટ-સપ્ટેમ્બર) વરસાદ ’સામાન્યથી ઉપર’ રહેવાની શક્યતા છે કારણ કે મહિનાના અંત સુધીમાં લા નીના સ્થિતિ સર્જાવાની પ્રબળ સંભાવના છે. જો કે ઓગસ્ટ મહિનાના મધ્યમાં ચોમાસાના તબક્કામાં થોડો વિરામ જોવા મળી શકે છે, આ બે મહિના દરમિયાન જે ખરીફ વાવણી તેમજ ઉભા પાક માટે મહત્વપૂર્ણ છે. બીજી તરફ સપ્ટેમ્બરમાં લા નીનાની અસરના પગલે થયેલા વરસાદને કારણે શહેરોમાં નીચાણવાળા વિસ્તારોમાં પૂર અને પહાડી વિસ્તારોમાં ભૂસ્ખલન થઈ શકે છે.
લા નીના એ મધ્ય અને પૂર્વ-મધ્ય વિષુવવૃત્તીય પેસિફિકમાં સમુદ્રની સપાટીના તાપમાનની સામયિક ઠંડક છે. આવી આબોહવાની પરિસ્થિતિઓ સામાન્ય રીતે ભારતમાં સારા ચોમાસાના વરસાદ સાથે સંકળાયેલી હોય છે. તેમ છતાં, દેશના કેટલાક ભાગોમાં હજુ પણ ’સામાન્યથી ઓછો’ વરસાદ પડી શકે છે. આઇએમડીના વડા મૃત્યુંજય મહાપાત્રાએ જણાવ્યું હતું કે, ચોમાસાની સીઝનના બીજા ભાગમાં દેશના મોટા ભાગના ભાગો, ઉત્તરપૂર્વ અને પૂર્વ ભારતના આસપાસના વિસ્તારો, લદ્દાખના ઘણા ભાગો, સૌરાષ્ટ્ર અને કચ્છ અને મધ્ય ભારતમાં સામાન્ય કરતાં વધુ વરસાદ થવાની સંભાવના છે.
જૂન મહિનામાં દેશમાં 11% ઓછો ચોમાસાનો વરસાદ નોંધાયો હોવા છતાં, ભૂગર્ભજળનો ઉપયોગ કરીને સિંચાઈની મદદથી દેશના ઘણા ભાગોમાં વાવણી કાર્ય અવિરત ચાલુ રહ્યું. આઇએમડીનો અંદાજ છે કે દક્ષિણપશ્ચિમ ચોમાસાની મોસમના ઉત્તરાર્ધ દરમિયાન (ઓગસ્ટથી સપ્ટેમ્બર) વરસાદ સામાન્ય કરતા વધારે રહેશે, જે લાંબા ગાળાની સરેરાશ (એલપીએ) ના 106 ટકાથી વધુ છે. 1971 થી 2020 સુધીના ડેટાના આધારે, આ સમયગાળા માટે એલપીએ આશરે 422.8 એમએમ છે. આઇએમડીએ એવી પણ આગાહી કરી છે કે ચોમાસાની સીઝનના બીજા ભાગમાં દેશના મોટાભાગના વિસ્તારોમાં સામાન્ય કરતાં વધુ વરસાદ પડશે, જેમાં કેટલાક ઉત્તરપૂર્વીય વિસ્તારો, પૂર્વ ભારતના ભાગો, લદ્દાખ, સૌરાષ્ટ્ર, કચ્છ અને મધ્ય અને દ્વીપકલ્પ્ના ભારતના કેટલાક અલગ-અલગ સ્થળોનો સમાવેશ થાય છે. ઓગસ્ટમાં સમગ્ર દેશમાં માસિક વરસાદ લાંબા ગાળાની સરેરાશ (એલપીએ) ના 94 ટકાથી 106 ટકા રહેવાની ધારણા છે, જે નબળા ચોમાસાની સ્થિતિનો સંભવ ટૂંકો સમય સૂચવે છે.

દેશમાં રાત્રી તાપમાનની દ્રષ્ટિએ જુલાઈ અત્યાર સુધીનો સૌથી ગરમ મહિનો : આઇએમડી
ભારતીય હવામાન વિભાગએ ગતરોજ જાહેરાત કરી હતી કે ભારતમાં રાત્રિના તાપમાનની દ્રષ્ટિએ જુલાઈ એ સૌથી ગરમ મહિનો હતો અને 1901 પછીનો બીજો સૌથી ગરમ જુલાઈ હતો. ઉત્તર પ્રદેશ, ગુજરાત અને કેરળ સહિતના વિવિધ રાજ્યોમાં અસાધારણ રીતે ભારે વરસાદ સાથે વિક્રમી ગરમી જોવા મળી હતી, જેના કારણે ગયા મહિને કેટલીક નદીઓમાં પૂર આવ્યું હતું. ભારતના પૂર્વ અને ઉત્તરપૂર્વીય વિસ્તારો માટે, સરેરાશ અને લઘુત્તમ તાપમાન બંનેની દ્રષ્ટિએ આ અત્યાર સુધીનો સૌથી ગરમ જુલાઈ હતો. હવેના મહિનાઓમાં જ્યાં સુધી તાપમાનનો સંબંધ છે, ગંગાના મેદાનો, મધ્ય ભારત અને દક્ષિણ-પૂર્વ કિનારાના કેટલાક વિસ્તારો સિવાય, દેશના મોટાભાગના ભાગોમાં મહત્તમ તાપમાન સામાન્યથી ઉપર રહેવાની ધારણા છે. દક્ષિણ-પૂર્વીય દ્વીપકલ્પ્ના મોટાભાગના વિસ્તારોમાં લઘુત્તમ તાપમાન સામાન્ય કરતાં વધુ રહેવાની શક્યતા છે.