કોલકાતાની આરજી કાર હોસ્પિટલના નાણાકીય ગેરરીતીના કેસની તપાસ કરી રહેલા EDએ દાવો કર્યો છે કે ભ્રષ્ટાચારના નાણાં ટ્રાન્સફર કરવા માટે માત્ર પેન અને કાગળ પર 10 નકલી કંપનીઓ ખોલવામાં આવી હતી.

ઈડી અનુસાર, આ કંપનીઓ હોસ્પિટલના પૂર્વ પ્રિન્સિપાલ સંદીપ ઘોષના નજીકના સંબંધીઓ અને મિત્રોના નામે ખોલવામાં આવી હતી. આ કંપનીઓના ખાતાનો ઉપયોગ કરીને નાણાંની ઉચાપત કરવામાં આવી હતી. ઈડીને અનેક કંપનીઓના ડિરેક્ટરોના નામ પણ મળ્યા છે. ટૂંક સમયમાં તેમની પૂછપરછ કરવામાં આવશે.

મહિલા ડૉક્ટર સાથેની ઘાતકી ઘટના બાદ હોસ્પિટલના પૂર્વ પ્રિન્સિપાલ સંદીપ ઘોષના ઘણા નજીકના સંબંધીઓ પોસ્ટમોર્ટમ પ્રક્રિયા સુધી ઘટના સ્થળે હાજર હતા. જેમાં ડોક્ટરો અને વકીલોનો સમાવેશ થાય છે. સીબીઆઈ તેમના પર નજર રાખી રહી છે. સૂત્રોના જણાવ્યા અનુસાર કેન્દ્રીય એજન્સીએ તેમની હાજરીને લઈને પૂછપરછ પણ કરી છે. બીજી તરફ વર્ષ 2017માં સંદીપ ઘોષની હોંગકોંગની એક હોસ્પિટલમાં જાતીય સતામણીના કેસમાં ધરપકડ કરવામાં આવી હતી.