યુક્રેન રાષ્ટ્રપતિ વોલોડીમીર ઝેલેન્સકીએ રશિયા-યુક્રેન યુદ્ધ અંગે ફરી વાર એક મોટું નિવેદન આપ્યું છે. તેમણે કહ્યું કે ડિસેમ્બરથી, રશિયા દરરોજ ઓછામાં ઓછા 1,000 સૈનિકો ગુમાવી રહ્યું છે. ઝેલેન્સકીએ પુતિનની આ હરકતને "પાગલપન" ગણાવ્યું અને કહ્યું કે રશિયા યુદ્ધને સમાપ્ત થતું અટકાવવા માટે આટલી મોટી કિંમત ચૂકવી રહ્યું છે. તેમણે અમેરિકા, યુરોપ અને અન્ય દેશોને એક થવા અને રશિયાને રોકવા માટે અપીલ કરી.

યુક્રેનિયન રાષ્ટ્રપતિએ કહ્યું કે આ યુદ્ધે બતાવ્યું છે કે વિશ્વ હજુ પણ આક્રમક દળોથી પોતાનું રક્ષણ કરવામાં અસમર્થ છે. તેમણે કહ્યું કે અમેરિકા, યુરોપ અને તમામ ભાગીદાર દેશોએ રશિયાને રોકવા માટે સંયુક્ત પગલાં લેવા જોઈએ.

ઝેલેન્સકીએ યુક્રેનને સહાયતા આપતા દેશોનો આભાર માન્યો. તેમણે કહ્યું, "યુક્રેન સાથે ઉભા રહેલા તમામ દેશોનો આભાર. અમે અમારા લોકો, અમારી સુરક્ષા અને અમારા પુનર્નિર્માણમાં મદદ કરનારાઓના આભારી છીએ.અગાઉ, ઝેલેન્સકીએ જાહેરાત કરી હતી કે રશિયાએ રાતોરાત યુક્રેન પર મોટો હવાઈ હુમલો કર્યો છે. રશિયાએ 242 ડ્રોન, 13 બેલિસ્ટિક મિસાઇલ અને 22 ક્રુઝ મિસાઇલ છોડ્યા. આ હુમલાઓમાં ઓછામાં ઓછા ચાર લોકો માર્યા ગયા અને ઘણા લોકો ઘાયલ થયા.

કિવમાં મોટું નુકસાન, એમ્બ્યુલન્સ કાર્યકરનું મોત

ઝેલેન્સકીના જણાવ્યા અનુસાર, રાજધાની કિવ અને તેની આસપાસના વિસ્તારોમાં હુમલા સૌથી ગંભીર હતા. એકલા કિવમાં ચાર લોકો માર્યા ગયા, જેમાં એક એમ્બ્યુલન્સ કાર્યકરનો પણ સમાવેશ થાય છે. લગભગ 20 રહેણાંક ઇમારતોને નુકસાન થયું.

ઝેલેન્સકીએ કહ્યું કે જ્યારે રાહત અને બચાવ કાર્યકર્તાઓ લોકોને મદદ કરી રહ્યા હતા, ત્યારે રશિયાએ તે જ રહેણાંક ઇમારત પર બીજો હુમલો કર્યો. તેમણે કહ્યું કે ઘણા વિસ્તારોમાં સમારકામ અને રાહત કાર્ય હજુ પણ ચાલુ છે. નોંધનીય છે કે રશિયા અને યુક્રેન વચ્ચેનું આ યુદ્ધ છેલ્લા ચાર વર્ષથી ચાલી રહ્યું છે. ઠંડા હવામાનને કારણે પરિસ્થિતિ વધુ મુશ્કેલ બની રહી છે, જેના કારણે ઉર્જા માળખા અને નાગરિકો પર અસર પડી રહી છે.