દિગ્ગજ ભારતીય ટેનિસ ખેલાડી રોહન બોપન્નાએ ટેનિસમાંથી નિવૃત્તિ જાહેર કરી છે. પેરિસ ઓલિમ્પિક 2024માં, બોપન્ના અને એન શ્રીરામ બાલાજીની ટીમને પુરુષ ડબલ્સ સ્પર્ધાના પ્રથમ રાઉન્ડમાં 7-5, 6-2થી હારનો સામનો કરવો પડ્યો હતો. હવે રોહન બોપન્નાએ પુષ્ટિ કરી છે કે આ તેની કારકિર્દીની છેલ્લી મેચ હતી. બોપન્નાએ 22 વર્ષ સુધી આંતરરાષ્ટ્રીય ટેનિસમાં ભારતનું પ્રતિનિધિત્વ કર્યું, પરંતુ હવે તેણે તેની ઐતિહાસિક કારકિર્દીને વિરામ આપી દિધો છે.

નિવૃત્તિનું નિવેદન આપતી વખતે તેણે કહ્યું, "આ મારી ટેનિસ કારકિર્દીની છેલ્લી ટૂર્નામેન્ટ હતી. હું સમજું છું કે હું એક ખેલાડી તરીકે ક્યાં પહોંચ્યો છું. હું જ્યાં છું તે મારા માટે મોટી ઉપલબ્ધિ છે. મેં ક્યારેય વિચાર્યું ન હતું કે હું ભારતનું પ્રતિનિધિત્વ કરીશ. છેલ્લા 20 થી વધુ વર્ષોથી ખૂબ જ ઉચ્ચ સ્તરે અને આજે 22 વર્ષ પછી હું ઓલિમ્પિકમાં મારા દેશનું પ્રતિનિધિત્વ કરી રહ્યો છું, મને આ ઐતિહાસિક કારકિર્દી પર ખૂબ ગર્વ છે.

6 વખત ગ્રાન્ડ સ્લેમ ફાઇનલિસ્ટ

રોહન બોપન્ના તેની ઐતિહાસિક ટેનિસ કારકિર્દીમાં 6 વખત ડબલ્સ સ્પર્ધામાં ગ્રાન્ડ સ્લેમ ફાઇનલિસ્ટ રહ્યો છે. આ સિવાય તેને બે વખત ગ્રાન્ડ સ્લેમ ચેમ્પિયન બનવાનું ગૌરવ પણ છે. 2017 માં, બોપન્નાએ કેનેડાની ગેબ્રિએલા ડાબ્રોવસ્કી સાથે મિક્સ્ડ ડબલ્સમાં ફ્રેન્ચ ઓપનનો ખિતાબ જીત્યો હતો. 2024 માં, તેણે ઓસ્ટ્રેલિયાના મેથ્યુ એબ્ડોન સાથે મળીને ઓસ્ટ્રેલિયન ઓપનનો ખિતાબ જીત્યો હતો.