ટેરિફ મુદ્દે દૂરગામી નિર્ણય લીધા પછી યુએસ રાષ્ટ્રપતિ ડોનાલ્ડ ટ્રમ્પ હવે ઇઝરાયલના એજન્ડા પર પાછા ફર્યા છે. ટ્રમ્પે હમાસને ગાઝામાં બંધક બનાવેલા ઇઝરાયલીઓને પરત કરવા માટે અંતિમ ચેતવણી આપી છે.ટ્રમ્પે હમાસના આતંકવાદીઓને ચેતવણી આપી છે કે તેઓ બંધકોને તાત્કાલિક પરતનહીં કરે તો તેમનું મૃત્યુ નિશ્ચિત છે. ટ્રમ્પે પોતાના સોશિયલ મીડિયા એકાઉન્ટ પર એક સંદેશ જારી કર્યો છે અને હમાસને અપીલ કરી છે કે તેઓ એક સ્માર્ટ નિર્ણય લે અને બંધકોને તાત્કાલિક મુક્ત કરે નહીં તો નરકનો દરવાજો ખોલી દેશું.ટ્રમ્પની આ પ્રતિક્રિયા વ્હાઇટ હાઉસ દ્વારા જણાવવામાં આવ્યા બાદ આવી કે અમેરિકન સરકારે હમાસ સાથે સીધી વાતચીત કરી છે અને તેમને પેલેસ્ટાઇનમાં બંધક બનાવેલા ઇઝરાયલીઓને મુક્ત કરવા જણાવ્યું છે.

હમણાં સુધી અમેરિકા હમાસ સાથે સીધો સંપર્ક કરતું ન હતું. અમેરિકન સરકારે 1997 માં હમાસને વિદેશી આતંકવાદી સંગઠન જાહેર કર્યું છે. ટ્રુથ સોશિયલ પરની એક પોસ્ટમાં ટ્રમ્પે ફાંસી આપવામાં આવેલા બંધકોના મૃતદેહો રાખવા બદલ હમાસને ‘મનોરોગી’ અને ‘બીમાર’ ગણાવ્યું. ટ્રમ્પે કહ્યું છે કે હમાસે આવા મૃતદેહોને સન્માન સાથે પરત કરવા જોઈએ.

ટ્રમ્પે હમાસના નેતૃત્વને તાત્કાલિક ગાઝા છોડવાનું આહ્વાન કર્યું છે અને ગાઝાના લોકોને અપીલ કરી છે કે 'સુવર્ણ ભવિષ્ય' તેમની રાહ જોઈ રહ્યું છે.ટ્રમ્પે પોતાની પોસ્ટમાં લખ્યું કે શાલોમ હમાસ એટલે હેલો અને ગુડબાય - તમે પસંદ કરી શકો છો. બધા બંધકોને હમણાં જ મુક્ત કરો, પછી નહીં અને તમે જે લોકોની હત્યા કરી છે તેમના મૃતદેહ હમણાં જ પરત કરો. નહીંતર તમારી વાર્તા અહીં જ પૂરી થઈ જશે. ફક્ત બીમાર અને માનસિક લોકો જ મૃતદેહો રાખે છે અને તમે લોકો બીમાર અને પાગલ છો!

ટ્રમ્પે પોતાના સંદેશમાં કહ્યું છે કે તેઓ ઇઝરાયલને આ મિશનને પાર પાડવા માટે જરૂરી બધું મોકલી રહ્યા છે. જો તમે મારા કહ્યા પ્રમાણે નહીં કરો તો હમાસનો એક પણ સભ્ય બચી નહીં શકે.અમેરિકી રાષ્ટ્રપતિએ કહ્યું છે કે હું હમણાં જ એ બંધકોને મળ્યો છું જેમના જીવન તમે બરબાદ કરી દીધા છે. આ તમારા માટે છેલ્લી ચેતવણી છે. જ્યાં સુધી નેતૃત્વની વાત છે, તમારા માટે ગાઝા છોડવાનો સમય આવી ગયો છે. તમારી પાસે હજુ પણ તક છે.ગાઝાના લોકોને સંબોધતા ટ્રમ્પે લખ્યું છે કે જ્યાં સુધી ગાઝાના લોકોની વાત છે એક સુવર્ણ ભવિષ્ય તમારી રાહ જોઈ રહ્યું છે પણ જો તમે બંધકોને રાખશો તો એવું નહીં થાય. જો તમે આવું કરશો તો તમારું મૃત્યુ નિશ્ચિત છે. સમજદારીપૂર્વક નિર્ણય લો. બધા બંધકોને હમણાં જ છોડી દો નહીં તો નર્કનો દરવાજો ખોલી દઈશું.

રાષ્ટ્રપતિ ટ્રમ્પ થોડા કલાકો પહેલા જ હમાસ દ્વારા બંધક બનાવવામાં આવેલા ઇઝરાયલી નાગરિકોને મળ્યા હતા. વ્હાઇટ હાઉસે આ બેઠકની તસવીરો જાહેર કરી છે. આમાં ટ્રમ્પ ઇઝરાયલી નાગરિકોની વેદના સાંભળતા જોવા મળે છે. એક મહિલા બંધકે જણાવ્યું કે હમાસના આતંકવાદીઓએ એક છોકરાને હાથકડી પહેરાવી અને તેનું માથું કાપી નાખ્યું.7 ઓક્ટોબર 2023 ના રોજ, હમાસે ઇઝરાયલ પર મોટા પાયે હુમલો કર્યો. આ હુમલો યહૂદી રજા ‘સિમચત તોરાહ’ના દિવસે સવારે શરૂ થયો હતો અને 1973ના યોમ કિપ્પુર યુદ્ધની 50મી વર્ષગાંઠના એક દિવસ પછી થયો હતો. હમાસના આતંકવાદીઓ ઘરે ઘરે ગયા અને નાગરિકો અને સૈનિકો પર હુમલો કર્યો.

હમાસે કિબુત્ઝ બેર એરી, કિબુત્ઝ નીર ઓઝ અને સુપરનોવા મ્યુઝિક ફેસ્ટિવલ જેવા સ્થળોએ ઘણા લોકોની હત્યા કરી. ઇઝરાયલી અધિકારીઓના જણાવ્યા અનુસાર આ હુમલામાં લગભગ 1,200 લોકો માર્યા ગયા હતા. જેમાં મહિલાઓ, બાળકો અને વૃદ્ધોનો સમાવેશ થાય છે. આ સમયગાળા દરમિયાન હમાસે 250 ઇઝરાયલીઓનું પણ અપહરણ કર્યું હતું. હમાસે આમાંથી કેટલાક બંધકોને પરત પણ કર્યા છે.