દ્વારકા -સોમનાથ નેશનલ હાઇવે પર પોરબંદરના રતનપર નજીક બેફામ સ્પીડમાં કાર ચલાવતા ઈસમે છકડો રીક્ષા ને પાછળથી ઠોકર મારતા રાણાવાવ રહેતા રીક્ષા ચાલકનું મોત નીપજ્યું છે.
રાણાકંડોરણા ગામે રહેતા અને નાસ્તાની લારી ચલાવતા લાલજીભાઈ ભુવા નામના આધેડે પોતાના રાણાવાવ ખાતે ગોપાલ પરામાં રહેતા ભાઈ પ્રેમજીભાઈ મનજીભાઈ ભુવા(ઉંમર વર્ષ ૪૯)નું અકસ્માતે મોત નીપજયાનો ગુનો નોંધાવ્યો છે જેમાં જણાવ્યું છે કે તેના ભાઈ પ્રેમજીભાઈ ગઈકાલે રાત્રે રાણાવાવ થી માધવપુર ખાતે રીક્ષા નો ફેરો કરવા માટે જતા હતા ત્યારે રતનપર ના પાટીયા પાસે પાછળથી ફૂલ સ્પીડે આવતી કારના ચાલકે છકડો રીક્ષા ને ઠોકર મારી દેતા રિક્ષા અને કાર બંને પલટી ખાઈને નીચે પડી ગયા હતા. જેમાં ગંભીર રીતે ઘવાયેલા રીક્ષા ચાલક પ્રેમજીભાઈ ભુવાને ઇમર્જન્સી સેવા ૧૦૮ મારફતે પોરબંદરની સરકારી ભાવસિંહજી હોસ્પિટલે પહોંચાડ્યા હતા જ્યાં ફરજ પરના તબીબો એ પ્રેમજીભાઈ ને મૃત જાહેર કરતા પોસ્ટ મોર્ટમ ની  કાર્યવાહી થઈ હતી. અને ત્યારબાદ લાલજીભાઈ ભુવા એ પોતાના ભાઈ પ્રેમજીભાઈ નું બેફિકરાઇથી કાર ચલાવીને મોત નીપજાવનાર કારના અજાણ્યા ચાલક સામે ગુનો નોંધાવ્યો છે.
ઉલ્લેખનીય છે કે નેશનલ હાઈવે ઉપર બેફામ સ્પીડ માં જતા વાહન ચાલકો સામે ટ્રાફિક પોલીસ વારંવાર જનજાગૃતિ ફેલાવે છે તેમ છતાં પણ ફૂલ સ્પીડે વાહન ચલાવનારાઓ આ રીતે અકસ્માત સર્જીને નિર્દોષ લોકોને મોતને ઘાટ ઉતારી રહ્યા છે ત્યારે તેઓની સામે કડક હાથે કામ લેવું જરૂરી બન્યું છે.