રાજકોટની વધુ એક સ્કૂલમાં વિદ્યાર્થિનીને પ્રિન્સિપાલ દ્વારા માર મારવામાં આવતો હોવાના સીસીટીવી સામે આવ્યા છે. 2 દિવસ પહેલા શહેરના મવડી પાળ રોડ પર આવેલી તપન સ્કૂલની ધોરણ 8ની વિદ્યાર્થિનીએ પ્રિન્સિપાલ એક-બે લાફા માર્યા હતા. જોકે બાદમા આ દીકરી સ્કૂલેથી કોઈને કહ્યા વિના નીકળી ગઈ હતી અને ઘરે પહોંચી ન હતી. જેથી વાલી પોલીસ મથકે પહોંચ્યા હતા. પોલીસે આખો દિવસ શોધ્યા બાદ આ દિકરી શહેરનાં 150 ફૂટ રિંગ રોડ પરથી મળી આવી હતી. જોકે, આજે જ્યારે આ સ્કૂલના સંચાલકને પૂછવામાં આવ્યું તો તેમણે કહ્યું કે, આ ઘટનામાં બધા ઘરના જ છે અને સમાધાન થઈ ગયું છે. 

View this post on Instagram

A post shared by Aajkaal (@aajkaaldaily)

માર માર્યાના સીસીટીવી સામે આવ્યા
શહેરની ખાનગી તપન સ્કૂલમાં 2 દિવસ પહેલા ધોરણ 8ની એક વિદ્યાર્થિની હોમવર્ક કરીને આવી ન હતી. જેથી આ દીકરીને પ્રિન્સિપાલ સ્વીટી મેડમે બોલાવી હતી અને બાદમાં હળવો લાફો માર્યો હતો. જેના CCTV પણ સામે આવ્યા હતા. જોકે આ ઘટના બાદ તે દીકરી શાળાના પ્લે ગ્રાઉન્ડમાંથી બહાર નીકળી ગઈ હતી અને તેની માનસિક પરિસ્થિતિ કેટલી ખરાબ હશે કે તે દીકરી પોતાના ઘરે ગઈ ન હતી. આ દરમિયાન સમગ્ર ઘટનાની જાણ વાલી દુષ્યંતભાઈ ત્રિવેદીને થતા તેઓ અને તેમના પત્ની તાલુકા પોલીસ મથક ખાતે પહોંચ્યા હતા અને દીકરી ગુમ થયાની જાણ કરી હતી. 

દીકરી હોમવર્ક કરીને આવી નહોતી
આચાર્યએ ઠપકો આપ્યાનું લાગી આવતા આ દીકરી સ્કૂલેથી ભાગી ગઈ હતી અને પોતાના ઘરે પહોંચી ન હતી. સવારે દસ વાગ્યા પછી ગુમ થયેલી દીકરી સાંજે છ વાગ્યે શહેરના 150 ફૂટ રિંગ રોડ ઉપરથી પગપાળા જતી મળી આવી હતી. જે બાદ વ્યથિત થયેલા માતા-પિતાએ રાહતનો શ્વાસ લીધો હતો. જોકે આ ઘટના ખૂબ જ ગંભીર છે તેથી આ સ્કૂલના સંચાલક પ્રવીણભાઈ ગોંડલિયાએ જણાવ્યું હતું કે, દીકરી હોમવર્ક કરીને આવી ન હતી. આથી તેને વાલીને સ્કૂલે બોલાવ્યા હતા અને પ્રિન્સિપાલ દ્વારા ઠપકો આપવામાં આવ્યો હતો. 

દીકરી શાળાના ગેટની બહાર ચાલી ગઈ
જોકે કોઈનું ધ્યાન ન હોય તે રીતે આ દીકરી સ્કૂલેથી પ્લેગ્રાઉન્ડમાં પહોંચી ગઈ હતી અને ત્યાંથી શાળાના ગેટની બહાર ચાલી ગઈ હતી. જોકે, બાદમાં આ દીકરી મળી આવી હતી અને હાલ કોઈ પ્રશ્ન નથી. ગુમ થયેલી દીકરી, શાળાનાં પ્રિન્સિપાલ અને વાલી ત્રણેય અમારા મિત્રો જેવા જ છે એટલે હવે કોઈ સમસ્યા નથી.