રાજકોટ જિલ્લા વહીવટી તંત્ર દ્વારા જાહેર કરવામાં આવેલી એક અખબારી યાદી અનુસાર રાજકોટ આંતરરાષ્ટ્રીય એરપોર્ટ તમામ નાગરિક ઉડ્ડયન સેવાઓ માટે આગામી 15 મેના રોજ સવારે 5:30 વાગ્યા સુધી બંધ રહેશે. અગાઉ આ એરપોર્ટ 7 મેથી 9 મે સુધી ત્રણ દિવસ માટે બંધ રાખવામાં આવ્યું હતું અને હવે આ સમયગાળો વધારી દેવામાં આવ્યો છે.

આમ રાજકોટથી ઉપડનારી તમામ સિવિલ ફ્લાઇટ્સ હવે 15 મેની સવાર સુધી રદ રહેશે. સંબંધિત મુસાફરો અને એરલાઇન્સને આ ફેરફારની નોંધ લેવા માટે અનુરોધ કરવામાં આવ્યો છે. એરપોર્ટ બંધ રાખવાનું કારણ હજુ સુધી સ્પષ્ટ કરવામાં આવ્યું નથી, પરંતુ માનવામાં આવે છે કે કોઈ સુરક્ષા કારણોસર અથવા ચાલી રહેલા કોઈ મહત્વપૂર્ણ કાર્યને લીધે આ નિર્ણય લેવામાં આવ્યો છે. મુસાફરોને તેમની મુસાફરીની યોજનાઓ આ મુજબ બદલવા માટે સલાહ આપવામાં આવે છે.