રાજકોટ જીલ્લાના ધોરાજી તાલુકાના કલાણા ગામમાં ધોધમાર 4 ઇંચ વરસાદ ખાબક્યો હતો. વરસાદના પગલે નીચાણવાળા વિસ્તારોમાં પાણી ભરાયા હતા. તેમજ તમામ ચેકડેમ ઓવરફ્લો થયા છે.

પ્રાપ્ત માહિતી પ્રમાણે ધોરાજી પંથકમાં આજે જાણે અષાઢી માહોલ જામ્યો હતો. જેમાં ધોરાજી તાલુકાના કલાણા ગામ સહિત આસપાસના ચીચોડ, છત્રાસા સહિતના ગામમાં ધોધમાર વરસાદ ખાબક્યો હતો. આજે પડેલા ધોધમાર વરસાદને પગલે નીચાણ વાળા વિસ્તારમાં પાણી ભરાયાના દ્રશ્યો સામે આવ્યા છે. તેમજ આસપાસના તમામ ચેકડેમો ઓવરફ્લો થઈ ગયા છે.

મહત્વનું છે કે કલાણા ગામમાં વાવાઝોડા જેવો પવન ફૂંકાયો હતો. તેના કારણે ગામમાં વીજળી ગુલ થઈ જતાં ગ્રામજનો મુશ્કેલીમાં મુકાઈ ગયા હતા. આ ઉપરાંત પડેલા ભારે વરસાદના કારણે ઉનાળુ પાકને ભારે નુકશાની થતાં ખેડૂતોમાં ચિંતાનું મોજું ફરી વળ્યું છે.