શહેરના જંગલેશ્વર વિસ્તારમાં આવેલા બુદ્ધનગરમાં મકાનમાં અને ઢેબર કોલોની વિસ્તારમાં શેરીમાં ચાલતી દેશી દારૂની ભઠ્ઠીને પીસીબીની ટીમે ઝડપી લઇ બે શખસોને પકડી પાડ્યા હતા.
જાણવા મળતી વિગતો મુજબ, પીસીબી ઇન્ચાર્જ પીઆઇ એમ.આર.ગોંડલીયાની રાહબરી હેઠળ ટીમ પેટ્રોલિંગમાં હતી દરમિયાન મળેલી બાતમીના આધારે જંગલેશ્વર બુધ્ધનગર શેરી નંબર-1 માં મકાનમાં દરોડો પાડી અહીં ચાલી રહેલી દેશી દારૂની ભઠ્ઠી ઝડપી લીધી હતી.
પોલીસે અહીંથી 45 લિટર દેશી દારૂ, 600 લીટર આથો સહિત રૂ.32,250 નો મુદ્દામાલ કબજે કરી આરોપી મહેશ ઉર્ફે બગો કાળુભાઈ જુલાની (ઉ.વ 30) ને ઝડપી લીધો હતો.
જ્યારે ઢેબર કોલોની ઇમામ ખાનાની સામે શેરીમાં ચાલી રહેલી દેશી દારૂની ભઠ્ઠી પર દરોડો પાડી આરોપી મનસુખ રણછોડભાઈ મકવાણા (ઉ.વ 52) ને ઝડપી લઇ અહીંથી રૂ.10,400 ની કિંમતનો 52 લીટર દેશીદારૂનો જથ્થો ઝડપી લઇ કાયદેસરની કાર્યવાહી કરી હતી.