શહેરના કાલાવાડ રોડ પર નાનામવા પાસે આવેલા ભીમનગરમાં રાત્રીના જનતા રેડ પડી હતી. આ જનતા રેડ દરમિયાન અહીંથી મોટી માત્રામાં દેશી દારૂનો જથ્થો મળી આવ્યો હતો. બંધાણીઓ માટેની દેશી દારૂની પોટલીઓ મળી આવી હતી. જનતા રેડ દરમિયાન આવી પહોંચેલી પોલીસને સ્થાનિકો માત્ર નામ પુરતુ નહીં પણ અંદર જઇ વ્યવસ્થિત ચેકિંગ કરો તો હજુ પણ મોટા પ્રમાણમાં દશી દારૂનો જથ્થો મળી આવશે તેવું આક્રોશભેર જણાવ્યું હતું.

અહીં દેશીદારૂના અડ્ડાના લીધે પ્યાસીઓ અહીં અડીંગો જમાવી બેસતા હોય જેથી રોજબરોજ નાની મોટી માથાકૂટ ઉપરાંત અહીંથી મહિલાઓ યુવતીઓને એકલુ પસાર થવું મુશ્કેલ બની જવા પામ્યું છે. જે બાબતે પોલીસને રજુઆત કરવામાં આવી હતી. પરંતુ પોલીસે નામ માત્રની કામગીરી કરી સંતોષ માની લીધો હોય તેમ આ શખસોની પ્રવૃત્તિ બેરોકટોકપણે ધમધમી રહી છે. જેથી અંતે લોકોની ધીરજ ખૂટતા આજે લોકોએ આ વિસ્તારમાં જતના રેડ કરી હતી. જે દરમિયાન દેશી દારૂનો જથ્થો મળી આવ્યો હતો. ત્યારે પોલીસ હવે આગામી દિવસોમાં દેશી દારૂના ધંધાર્થીઓ પણ કડક કાર્યવાહી કરે છે કે કેમ? કે પછી જેસે થે એ જોવાનુ રહ્યું.