​​​​​​​ગ્રીસના મહાન રાજા સિકંદરને કોણ નથી જાણતું. દુનિયાને જીતનાર સિકંદરની મહાનતાની ઘણી વાતો છે જેને સદીઓ પછી પણ લોકો યાદ કરે છે, પરંતુ શું જાણો છો કે સિકંદરના વંશજો આજે ક્યાં રહે છે?  એક એવું ગામ છે જ્યાંના લોકો પોતાને સિકંદરના વંશજ માને છે. જો બહારથી કોઈ પણ વ્યક્તિ આ ગામમાં જાય તો તેને કોઈ પણ વસ્તુને સ્પર્શ કરવાની મનાઈ છે. જો કોઈ વ્યક્તિ મનાઈ હોવા છતાં પણ કોઈ વસ્તુને સ્પર્શ કરે છે તો તેને 1,000 થી 2,500 રૂપિયાનો દંડ થઈ શકે છે, પરંતુ આવું શા માટે?

આ ગામના લોકો પોતાને માને છે સિકંદરના વંશજ

આ વાત છે હિમાચલ પ્રદેશના મલાણા ગામની. હિમાલયના શિખરોની વચ્ચે આવેલું આ ગામ ઊંડી કોતરો અને બરફીલા પહાડોથી ઘેરાયેલું છે. લગભગ 1700 લોકોની વસ્તી ધરાવતું આ ગામ પ્રવાસીઓમાં પણ ઘણું પ્રખ્યાત છે. ખાસ વાત એ છે કે અહીંના લોકોનું કહેવું છે કે તેઓ ગ્રીસના પ્રખ્યાત રાજા સિકંદરના વંશજ છે.

એવું માનવામાં આવે છે કે જ્યારે સિકંદરે ભારત પર હુમલો કર્યો ત્યારે તેના કેટલાક સૈનિકોએ મલાણા ગામમાં આશ્રય લીધો હતો અને  ત્યારબાદ તેઓ અહીં સ્થાયી થયા હતા. અહીંના લોકો એલેક્ઝાન્ડરના તે સૈનિકોના વંશજ હોવાનું કહેવાય છે. જો કે આમાં કેટલું સત્ય છે તે હજુ સુધી બહાર આવ્યું નથી.

ગામમાં સિકંદરના જમાનાની વસ્તુઓ

જો કે  અહીં આવનારા લોકોને એ જોઈને આશ્ચર્ય થાય છે કે સિકંદરના સમયની વસ્તુઓ આજે પણ મલાણા ગામમાં રાખવામાં આવી છે. આ ગામના મંદિરમાં સિકંદરના જમાનાની તલવાર પણ મળી આવી છે. અહીંના લોકો કનાશી નામની ભાષા બોલે છે જે ખૂબ જ રહસ્યમય છે.  આ ભાષા આ ગામ સિવાય બીજે ક્યાંય બોલાતી નથી  પરંતુ આ લોકો તેને પવિત્ર ભાષા માને છે. ઘણા દેશોમાં આ અંગે સંશોધન પણ થઈ રહ્યું છે.