પાકિસ્તાને ચીન પાસેથી એક નવી સબમરીન, હંગોર ખરીદી છે. જે એઆઇપીથી સજ્જ છે. આ વિશ્વ કક્ષાની સબમરીન લાંબા સમય સુધી પાણીની અંદર રહી શકે છે. આ શક્તિશાળી સબમરીનને તેના કાફલામાં ઉમેરવાથી પાકિસ્તાની નૌકાદળની ક્ષમતાઓમાં વધારો થયો છે. ઇસ્લામાબાદ હંગોર સબમરીનનો ઉપયોગ કરીને બંગાળની ખાડીમાં ભારતને ઘેરી લેવાનું કાવતરું ઘડી રહ્યું છે.

પાકિસ્તાની નૌકાદળના એક વરિષ્ઠ અધિકારીના મતે, આ સબમરીન બંગાળની ખાડીમાં ઇસ્લામાબાદની હાજરીને મજબૂત બનાવી શકે છે, એક એવો વિસ્તાર જ્યાં 1971ના યુદ્ધમાં હાર અને બાંગ્લાદેશની રચના પછી પાકિસ્તાની નૌકાદળની હાજરી નહિવત રહી છે. પાકિસ્તાની નૌકાદળના અધિકારીની યોજનાઓ એવા સમયે જાહેર કરવામાં આવી છે જ્યારે પાકિસ્તાન અને બાંગ્લાદેશ વચ્ચેના સંબંધો સુધરી રહ્યા છે અને ભારત સહિત હિંદ મહાસાગરના દેશો વચ્ચે નૌકાદળ સ્પર્ધા પણ વધી રહી છે.

શ્રીલંકાની ન્યૂઝ વેબસાઇટ અનુસાર, પાકિસ્તાની નૌકાદળના અધિકારી ફારૂકે નવી સબમરીનને ગેમ ચેન્જર ગણાવી હતી અને કહ્યું હતું કે હેંગોર-ક્લાસ સબમરીનનો ઉમેરો બંગાળની ખાડીમાં પાકિસ્તાનની હાજરીને મજબૂત બનાવશે. ફારૂકના જણાવ્યા મુજબ, પાકિસ્તાન તેની નૌકાદળમાં આવી આઠ વધુ સબમરીન ઉમેરવાની યોજના ધરાવે છે. પીએનએસ હેંગોરના આગમન પહેલાં, પાકિસ્તાની નૌકાદળ પાસે પાંચ સબમરીન હતી. આ નવી ચીની નિર્મિત હેંગોર-ક્લાસ સબમરીન પાકિસ્તાનની જૂની થઈ ગયેલી અગોસ્તા સબમરીનનું સ્થાન લેશે.

પાકિસ્તાની નૌકાદળના એક વરિષ્ઠ અધિકારી દ્વારા આપવામાં આવેલું નિવેદન મહત્વપૂર્ણ છે કારણ કે બંગાળની ખાડી ભારત માટે એક મહત્વપૂર્ણ ક્ષેત્ર છે. આ ક્ષેત્રમાં ભારતનું ભૌગોલિક સ્થાન ભારતને નોંધપાત્ર વ્યૂહાત્મક લાભ પ્રદાન કરે છે. ભારતનું પૂર્વીય નૌકાદળ કમાન્ડ વિશાખાપટ્ટનમમાં સ્થિત છે, અને આ પ્રદેશ આંદામાન અને નિકોબાર ટાપુઓની ખૂબ નજીક પણ છે. વધુમાં, ભારત અને બાંગ્લાદેશ વચ્ચે માલ અને ઊર્જાના વેપાર માટે બંગાળની ખાડી વધુને વધુ મહત્વપૂર્ણ બની રહી છે.

ભારત, બાંગ્લાદેશ, મ્યાનમાર, થાઈલેન્ડ, મલેશિયા, ઇન્ડોનેશિયા અને શ્રીલંકા જેવા દેશો બંગાળના અખાતને કિનારે સ્થિત છે. હિંદ-પ્રશાંત ક્ષેત્રમાં વધતી જતી લશ્કરી શક્તિ અને તેમની વચ્ચેની સ્પર્ધાએ આ પ્રદેશનું રાજકીય અને વ્યૂહાત્મક મહત્વ વધાર્યું છે.

હંગર સબમરીનની વિશેષતાઓની વાત કરવામાં આવે તો એઆઈપી સિસ્ટમનો ઉપયોગ કરીને બે અઠવાડિયા સુધી પાણીની અંદર રહી શકે છે. છ 533 મીમી ટોર્પિડો ટ્યુબથી સજ્જ છે. ભારે ટોર્પિડો અને એન્ટી-શિપ ક્રુઝ મિસાઇલો લોન્ચ કરવામાં સક્ષમ છે. પાકિસ્તાનની બાબર 3 સબમરીન-લોન્ચ કરાયેલ ક્રુઝ મિસાઇલ તૈનાત કરવામાં પણ સક્ષમ છે.