મુંબઈ અને મહારાષ્ટ્રના અનેક વિસ્તારોમાં પહોંચી ગયેલું નૈઋત્યનું ચોમાસું હજુ ગુજરાતમાં આવ્યું નથી. પરંતુ વરસાદી માહોલ ધીમે ધીમે જમાવટ કરી રહ્યો છે. આજે સવારે છ વાગ્યે પૂરા થતા 24 કલાક દરમિયાન રાજ્યના ૮૯ તાલુકામાં સામાન્ય ઝાપટાથી સવા બે ઇંચ જેટલો વરસાદ થયો છે.સૌથી વધુ વરસાદ અરવલ્લી જિલ્લાના મોડાસા, પાટણ જિલ્લાના સરસ્વતી, આણંદ જિલ્લાના અંકલાવ અને મહેસાણામાં નોંધાયો છે.

રાજ્યના અનેક વિસ્તારોમાં યલો એલર્ટ જાહેર 

હવામાન ખાતાના જણાવ્યા મુજબ આજે અમરેલી ભાવનગર અમદાવાદ વડોદરા ઇડર અને ડીસામાં તોફાની પવન સાથે ભારે વરસાદનું ઓરેન્જ એલર્ટ આપવામાં આવ્યું છે. રાજકોટ પોરબંદર વેરાવળ દ્વારકા ઓખા સહિત રાજ્યના અનેક વિસ્તારોમાં યેલ્લો એલર્ટ જાહેર કરવામાં આવ્યું છે.

માછીમારોને દરિયામાં ન જવા માટે ચેતવણી 

દરમિયાનમાં બંગાળની ખાડીમાં નોર્થ વેસ્ટ દિશામાં ઓડિશા નજીક સર્જાયેલું વેલમાર્ક લો પ્રેસર ડિપ્રેશનમાં પરિવર્તિત થયા પછી આજે સવારે 5:30 વાગે તે ડીપ ડિપ્રેશનમાં ફેરવાઈ ગયું છે અને નોર્થ દિશા તરફ ગતિ કરી રહ્યું છે. આ સિસ્ટમ પશ્ચિમ બંગાળ અને બાંગ્લાદેશ વચ્ચે સાગર તથા ખેપુપુરા વચ્ચે આજે બપોરે ત્રાટકે તેવી શક્યતા છે. બંગાળની ખાડી અને અરબી સમુદ્રમાં પ્રતિ કલાકના 55 થી 70 કીલોમીટરની ઝડપે પવન ફૂકાઈ રહ્યો છે અને તેથી માછીમારોને દરિયામાં ન જવા માટે ચેતવણી આપવામાં આવી છે.

ગમે ત્યારે વરસાદ તૂટી પડે તેવું વાતાવરણ 

મંગળવારે ગરમીના પ્રમાણમાં ચારથી પાંચ ડિગ્રી જેટલો ઘટાડો થયા બાદ બુધવારે તે ધોવાઈ ગયો છે અને રાજકોટ સહિત રાજ્યના અનેક શહેરોમાં ફરી મહત્તમ તાપમાન 40 ડિગ્રીને પાર કરી ગયું છે. અસહ્ય ગરમી અને ઉકળાટ વચ્ચે આજે રાજ્યના અનેક ભાગોમાં સવારે વાદળો જોવા મળ્યા છે અને ગમે ત્યારે વરસાદ તૂટી પડે તેવું વાતાવરણ છે.